اسپان استى ەلىنىڭ استاناسىندا قازاق ساز ونەرىنىڭ سايىپقىرانى، كومپوزيتور، ديريجەر، قازاقستاننىڭ حالىق ءارتيسى نۇرعيسا تىلەندييەۆتىڭ 100 جىلدىعىنا ارنالعان حالىقارالىق مادەني كەش ءوتتى دەپ حابارلايدى bairaqmedia.kz
مەرەيتوي اياسىندا بەيجىڭنىڭ ورتالىق كونسەرت زالىندا «ءالقيسسا» اتتى شىعارماشىلىق باعدارلاما ۇيىمداستىرىلىپ، كەش بارىسىندا قازاقتىڭ ءبىرتۋار سازگەرىنىڭ ءومىرى مەن شىعارماشىلىعىنا ارنالعان مۋزىكالىق تۋىندىلار ورىندالدى.
سالتاناتتى ءىس-شاراعا الماتى وبلىسىنىڭ اكىمى مارات ەلەۋسىز ۇلى سۇلتانعازييەۆ قاتىسىپ، قۇتتىقتاۋ ءسوز سويلەدى. ءوڭىر باسشىسى ءوز سوزىندە ەكى ەل اراسىنداعى مادەني ىقپالداستىقتىڭ ماڭىزدىلىعىن اتاپ ءوتتى.
نۇرعيسا تىلەندييەۆ – قازاق رۋحانياتىنىڭ التىن قازىعى. ونىڭ ماڭگىلىك اۋەندەرى — حالقىمىزدىڭ جۇرەگىندە ساقتالعان ۇلتتىق كودتىڭ ءبىر بولىگى. ۇلى تۇلعانىڭ عاسىرلىق مەرەيتويىنىڭ بەيجىڭدە اتالىپ ءوتۋى – قازاقستان مەن جۇڭگو اراسىنداعى دوستىقتىڭ، ءوزارا قۇرمەت پەن مادەني بايلانىستاردىڭ بيىك كورىنىسى، – دەدى مارات سۇلتانعازييەۆ.
رەسمي بولىمنەن كەيىن شىعارماشىلىق كەش جالعاسىپ، كورەرمەن نازارىنا ن.تىلەندييەۆ اتىنداعى «وتىرار سازى» فولكلورلى-ەتنوگرافيالىق وركەسترىنىڭ ورىنداۋىنداعى شىعارمالار ۇسىنىلدى. وركەسترگە قازاقستاننىڭ ەڭبەك سىڭىرگەن قايراتكەرى، سازگەردىڭ قىزى ءدىنزۋحرا تىلەندييەۆا ديريجەرلىك ەتتى.
سونىمەن قاتار ساحنا تورىندە داۋلەسكەر كۇيشى، قازاقستاننىڭ حالىق ءارتيسى سەكەن تۇرىسبەك، ق ر ەڭبەك سىڭىرگەن قايراتكەرلەرى نۇركەن ءاشىروۆ پەن مادينا ءسادۋاقاسوۆا، سونداي-اق الماتى وبلىسىنىڭ ونەرپازدارى ونەر كورسەتتى. شارا اياسىندا قازاقتىڭ ءداستۇرلى قولونەرى مەن جەڭىل ونەركاسىپ ونىمدەرىنىڭ كورمەسى دە ۇيىمداستىرىلدى.
كونسەرتكە قاتىسقان بەيجىڭ قالاسىنىڭ تۇرعىنى قالامقاس سەرىك قىزى ءوز اسەرىمەن ءبولىستى.
نۇرعيسا تىلەندييەۆتىڭ مۋزىكاسى – جۇرەككە جەتەتىن شىن ونەر. كۇي مەن اۋەن ارقىلى تۋعان ەلدىڭ رۋحى مەن بولمىسى سەزىلدى. قىتايدا تۋىپ-وسسەم دە، قازاق بولىپ تۋعانىما تاعى ءبىر مارتە ماقتاندىم، – دەدى ول.
ايتا كەتەيىك، يۋنەسكو كولەمىندە اتالىپ جاتقان مەرەيتوي اياسىندا نۇرعيسا تىلەندييەۆتىڭ شىعارماشىلىعىن ناسيحاتتاۋعا باعىتتالعان حالىقارالىق شارالار جىل بويى جالعاسادى. الماتى وبلىسى بۇل باستامانىڭ بەل ورتاسىندا.
