وتىرار اۋدانىنداعى كيەلى كوكساراي اۋىلىندا جەڭىستىڭ 80 جىلدىعى قارساڭىندا وسى ەلدىمەكەننىڭ تاريحىنان سىر شەرتەتىن جاڭا ەستەلىك ساياباعى اشىلدى دەپ حابارلايدى bairaqmedia.kz

ساياباقتىڭ اشىلۋ سالتاناتىنا اۋىل تۇرعىندارى، يگى باستامانىڭ جۇزەگە اسۋىنا ات سالىسقان ورازحان جانىسبەكوۆ، ءماجىلىس دەپۋتاتى ولجاس قۇسپەكوۆ جانە وتىرار اۋدانىنىڭ اكىمى قايرات جولدىباي دا قاتىستى. 

ساياباق جالپى سانى 12 تاريحي مەموريالدىق ەسكەرتكىشتەن تۇرادى. ونىڭ كوركىنە ءسان بەرىپ تۇرعان نەگىزگى ەسكەرتكىش «تاۋەلسىزدىك مونۋمەنتى» دەپ اتالادى.

بۇل جەردەن تاريحتا وشپەس ءىز قالدىرعان كوكسارايلىقتار تۋرالى ماعلۇمات الۋعا بولادى. ەسكەرتكىشتەردىڭ بىرىندە تۇعىرى بيىك تۇلعالاردىڭ سۋرەتتەرى مەن ولار تۋرالى اقپارات جازىلعان. ەندى بىرىندە كوكسارايلىق رەپرەسسيا مەن اشارشىلىق قۇرباندارىنىڭ ءتىزىمى بەرىلگەن. ۇلى وتان سوعىسى كەزىندە قازا تاپقان جاۋىنگەرلەرگە دە ۇلكەن ەسكەرتكىش ارنالعان. تىل جانە ەڭبەك ارداگەرلەرى دە نازاردان تىس قالماپتى. ياعني، ساياباقتىڭ بيىل 80 جىلدىعى تويلانىپ جاتقان جەڭىس كۇنى قارساڭىندا اشىلۋى تەگىن ەمەس.

مەموريالدىق ەسكەرتكىشتەردە كوكسارايلىق باتىر انالار مەن ۇلاعاتتى ۇستازدار، جالپى ەڭبەگىمەن ەل قۇرمەتىنە بولەنگەن تۇلعالار تۋرالى دا دەرەكتەر جازىلعان.  

ساياباققا جاسىل جەلەك وتىرعىزىلىپ، اۋىلعا ەرەكشە كورىك بەرىپ تۇر. بۇل جەر وسى ەلدىمەكەننىڭ تاريحى مەن مادەنيەتىن ناسيحاتتايتىن بىرەگەي ورىنعا اينالماق.

ايتا كەتەيىك، پايدالانۋعا بەرىلگەن ساياباق اۋىل جاناشىرى، «TOLAGAI-2050» كومپانياسىنىڭ قۇرىلتايشىسى ورازحان جانىسبەكوۆتىڭ باستاماسىمەن سالىنعان. اشىلۋ سالتاناتىندا وتىرار اۋدانىنىڭ اكىمى وعان ەرەكشە الىعىسىن ءبىلدىردى. ءارى بۇل ءاربىر قازاق ازاماتىنا ۇلگى بولارلىق يگى ءىس ەكەنىن اتاپ ءوتتى.

اشىلىپ جاتقان ەستەلىك ساياباعى سوعىستا باتىرلىق جاساعان اتالارىمىزدى قۇرمەتتەۋ، ولارعا جاسالعان تاعزىم بولىپ سانالادى. اۋىل ازاماتىنىڭ ونەگەلى ءىسى قازىرگى جاستارعا ۇلگى بولارى ءسوزسىز، - دەدى وتىرار اۋدانىنىڭ اكىمى قايرات جولدىباي.

ورازحان جانىسبەكوۆ 2015 جىلى «قۇتتى مەكەن-كوكساراي» جوباسىن قولعا العان بولاتىن. مىنە، ەستەلىك ساياباعى سونىڭ اياسىندا اشىلىپ وتىر. ايتا كەتەيىك، ورازحان جانىسبەكوۆ بۇعان دەيىن كوكسارايدىڭ تاريحي جانە ەتنوگرافيالىق مۇراسىن زەرتتەپ، عىلىمي اعارتۋشىلىق جۇمىستار اتقاردى.

سونداي-اق، اۋىلعا كىرەبەرىستە 5 مىڭ ءتۇپ اعاش وتىرعىزىپ، ونىڭ جان-جاعىن مال كىرمەۋى ءۇشىن ارنايى قورشاتقانىن ايتا كەتكەن ءجون. جازى وتە ىستىق وڭىردە ءقازىر اعاشتار تامشىلاتىپ سۋارۋ ءادىسىنىڭ كومەگىمەن جايقالىپ ءوسىپ تۇر.  

مۇنىمەن، ورازحان جانىسبەكوۆتىڭ كوكسارايداعى يگى ىستەرى بىتپەيدى. بىلتىر ول اۋىلعا «Tolagai» دەپ اتالاتىن سپورت كەشەنىن سالىپ بەردى. بۇگىنگى مەرەكە قارساڭىندا مۇندا وقۋشىلار اراسىندا سپورتتىق جارىس ءوتىپ جاتقانىنا كۋا بولدىق.

تۋعان جەرىنە ۇلكەن قارجى مەن كۇش جۇمساۋ ارقىلى ورازحان كەنجەعۇل ۇلى اۋىلدىڭ الەۋمەتتىك-مادەني دامۋىنا وراسان زور ۇلەس قوسىپ كەلەدى.