شىمكەنتتە 4 جىل بۇرىن سالىنعان «شىمقالا» تاريحي-مادەني كەشەنى قيراپ جاتىر. بيۋدجەتتىڭ 2 ميلليارد 700 ميلليون تەڭگەcىنە سالىنعان نىساننىڭ قۇجاتى دا جوق بولىپ شىقتى دەپ حابارلايدى bairaqmedia.kz

ءقازىر سيتادەلدىڭ قاسبەتتەرى ۇشىپ، قابىرعالارى مۇجىلگەن. كونە مادەنيەتىمىزدى ايشىقتاۋى ءتيىس بولعان نىسان تۋريست تارتۋدىڭ ورنىنا، كەلۋشىلەردى شوشىتىپ وتىر.

تۋريستىك ورىننىڭ قازىرگى كۇيى ادام شوشىرلىق. كىرۋ ءۇشىن ءار تۋريستەن 1000 تەڭگە الادى. سۇمدىق. ءبارى قيراپ جاتىر، - دەدى «شىمقالا» تاريحي-مادەني كەشەنىنە بارعان تۇرعىنداردىڭ ءبىرى. 

سىرتقى كەتىكتەردىڭ ءبىرازىن كەشەن قىزمەتكەرلەرى وعاش كورىنبەس ءۇشىن ءتۇرلى ماتەريالدارمەن جاۋىپ قويعان. قۇرىلىسى بىتكەنىنە 5 جىل بولماعان قابىرعالارىنىڭ سىرلارى ۇشىپ، سۇرەڭسىز كۇيگە تۇسكەن. ال، وسى كەشەننىڭ ءبىر بولىگى سانالاتىن ەتنواۋىل ءتىپتى جابىلىپ تىنىپتى. توزىعى جەتكەن كيىز ۇيلەر، التىباقان مەن ىشكى جابدىقتاردى شەتكە جايعاستىرىپ، ەتنواۋىل بولىگىنىڭ قاقپاسىن جاۋىپ تاستاعان. 

سويتسە، شىمكەنتكە تۋريست تارتۋ ءۇشىن قىرۋار قاراجاتقا سالىنعان نىساننىڭ قۇجاتى دا جوق ەكەن. ياعني، قالا باسشىلىعى 3 ميلليارد تەڭگەگە جۋىق اقشا شىعارىپ، كەشەننىڭ ءوزىن سالعاندا بىردە-بىر قۇجاتىن رەتكە كەلتىرمەگەن. سوندىقتان، 8 جارىم گەكتاردى الىپ جاتقان شىمقالا كەشەنىنە نە بيۋدجەتتەن، نە دەمەۋشىلەر ەسەبىنەن ازىرگە ءبىر تيىن شىعارىپ، جوندەي المايمىز دەپ وتىر.

ءدال قازىرگى تاڭدا كەشەن مۋزەيدىڭ تەڭگەرىمىندە. تەك قانا جەردى پايدالانۋعا مەملەكەتتىك اكتىسى عانا بار. ۇستىندەگى قۇجاتتارى، قابىلداپ الۋ اكتىسى جاسالىنباۋى سەبەپتى ۇستىندەگى عيماراتتار، ياعني، قايسىسى ونىڭ جاڭا قۇرىلىس نەمەسە قايسىسى قالپىنا كەلتىرىلگەن ەسكەرتكىش ەكەنى ناقتىلانباۋ سەبەپتى بۇل جەردىڭ قۇجاتى جوق دەپ ايتۋعا تولىق نەگىز بار، - دەدى شىمكەنت قالالىق مۋزەيلەر بىرلەستىگى مكك ديرەكتورى جاندوس قۇربان.