مادەنيەت جانە اقپارات ءمينيسترى ايدا بالايەۆا «قازاقفيلم» كينوستۋدياسىن قاتىستى قوعامدا الاڭداۋشىلىق تۋدىرىپ وتىرعان ءبىرقاتار ماسەلەگە تۇسىنىكتەمە بەردى، دەپ حابارلايدى Bairaqmedia.kz.
مينيستر الدىمەن كينو سالاسىنا قاتىسى بار تۇلعالاردىڭ كينوستۋديا توڭىرەگىندەگى پروسەستەرگە قاتىستى ءوز پىكىرىن بىلدىرۋگە قۇقىعى بارىن، الايدا اقپارات تاراتقاندا تەك فاكتىلەرگە سۇيەنۋگە كەڭەس بەردى.
«قازاقفيلم» جەرىنىڭ ساتىلۋى جونىندەگى نەگىزسىز قاۋەسەت ءبىرجولا توقتاتىلۋى ءتيىس. «قازاقفيلمگە» تيەسىلى جەرلەر كينوستۋديا يەلىگىندە قالا بەرەدى. جەر ساتىلعان جوق جانە تەك كينەماتوگرافيا مۇددەسى ءۇشىن پايدالانىلىپ وتىر، – دەدى ايدا بالايەۆا.
سونداي-اق ول كينوستۋديانى جوندەۋگە قوماقتى قارجى سالۋعا دايىن ينۆەستورلاردىڭ بارى جايىندا مالىمدەمەلەردى قۇجاتتارمەن نەمەسە ناقتى كەپىلدىكتەرمەن راستاي المايتىن ادامدار تاراتىپ وتىرعانىن اتاپ ءوتتى.
مەملەكەت، ياعني مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن. دەگەنمەن ازىرگە ەشقانداي ناقتى ۇسىنىس، بىردە-بىر كەپىلدىك حاتى جوق. بارلىعى تەك اڭگىمە دەڭگەيىندە، – دەدى مينيستر.
ايدا بالايەۆا كينوستۋديانى استاناعا كوشىرۋ تۋرالى اقپاراتتى دا جوققا شىعاردى.
بۇل دا ەشقانداي نەگىزى جوق قاۋەسەت. ءقازىر ەلورداعا «قازاقانيماسيا» شىعارماشىلىق بىرلەستىگىن كوشىرۋ مۇمكىندىگى قاراستىرىلىپ جاتىر. مۇندا ماڭىزدى جايت – «قازاقانيماسيا» وندىرىستىك بازا ەمەس، انيماسيالىق كونتەنت جاساۋعا تاپسىرىستاردى بولەتىن قۇرىلىم. سوندىقتان ونىڭ استاناعا كوشۋى سالانىڭ جۇمىسىنا ەش كەدەرگى كەلتىرمەيدى. وكىنىشكە قاراي، كەيىنگى بەس جىلدا ەلىمىزدە ساپالى انيماسيالىق فيلمدەر تۇسىرىلگەن جوق. وسىعان بايلانىستى انيماسيالىق يندۋستريانى كرەاتيۆتى يندۋستريالار قورىنىڭ اياسىندا دامىتۋ ورىندى بولماق. قور قۇرىلىمىندا انيماسيانى دامىتۋعا باعىتتالعان كرەاتيۆتى حاب جاساقتالۋدا، – دەپ تولىقتىردى مينيستر.
ۆەدومستۆو باسشىسى جاڭا زاڭعا سايكەس ەلىمىزدە فيلمدەردى قارجىلاندىرۋدىڭ جالپى كولەمىنىڭ كەمىندە 30%-ى جىل سايىن تىكەلەي «قازاقفيلمگە» باعىتتالاتىنىن اتاپ ءوتتى.
اتاپ ايتقىم كەلەتىنى، «قازاقفيلم» تەك كينوتۋىندىلار عانا ەمەس، ەڭ الدىمەن – شارۋاشىلىق جۇرگىزۋشى كومپانيا جانە باسەكەگە قابىلەتتى نارىق قاتىسۋشىسى. ول جوعارى كاسىبي كينوونەردىڭ دامۋىنا لايىقتى جاعداي جاسايدى. سوندىقتان مينيسترلىك بۇل كاسىپورىندى رەجيسسەر نەمەسە اكتەر ەمەس، كينوستۋديا قىزمەتىن تابىستى ءارى ءتيىمدى جۇرگىزۋگە قابىلەتتى كاسىبي مەنەدجەر باسقارۋى ءتيىس دەگەن قاعيدانى بەرىك ۇستانادى.«ءقازاقفيلمنىڭ» تۇراقتى ءارى ءتيىمدى دامۋىن قامتاماسىز ەتۋ ءۇشىن مينيسترلىك جان-جاقتى قولداۋ كورسەتۋدى جالعاستىرا بەرەدى، – دەپ تۇيىندەدى امدا بالايەۆا.
