گولان جوتاسىنا قازاقستان قارۋلى كۇشتەرىنىڭ ەكىنشى لەگى اتتاندى دەپ حابارلايدى Bairaqmedia.kz. ولار بۇۇ بىتىمگەرلىك ميسسياسى اياسىندا قىزمەت ەتەدى.
139 جاۋىنگەر بۇگىن سيريا استاناسى داماسكىگە ۇشىپ كەتتى. بىتىمگەرلىك كۇشتەرىن شىعارىپ سالۋ سالتاناتى الماتىداعى قۇرلىق اسكەرى ينستيتۋتىندا ءوتتى. «گولان جوتاسىندا بىتىمگەرلىك كۇشتەرىن جىبەرۋ الەمدىك ارەنادا قازاقستان مەن ونىڭ قارۋلى كۇشتەرىنىڭ بيىك مارتەبەسىن ايعاقتايدى. بۇۇ مانداتى اياسىندا جۇكتەلگەن مىندەتتى ابرويمەن اتقارۋعا دايىنبىز» دەدى قورعانىس ءمينيسترىنىڭ ورىنباسارى شايح-حاسان جازىقبايەۆ. جاۋىنگەرلەر اراسىندا ەكى ايەل ادام بار ەكەن. ساربازدار قاقتىعىس ايماعىندا قاۋىپسىزدىكتى باقىلاۋ، بلوك بەكەتتەردى كۇزەتۋ، جارىلعىشتاردى زالالسىزداندىرۋ جانە بۇۇ قىزمەتكەرلەرىن كۇزەتۋ سياقتى قىزمەتتەردى اتقارادى. ال بىتىمگەرلىك كۇشتەرىنىڭ ءبىرىنشى لەگى قىزمەتتى اياقتاپ، ەلگە ورالدى.
