«زاڭ جانە ءتارتىپ» يدەولوگياسىن جۇزەگە اسىرۋ اياسىندا اقتوبە وبلىسى بويىنشا ەكونوميكالىق تەرگەۋ دەپارتامەنتىمەن «Harmony Rider Technology» (HRT) ينۆەستيسيالىق جوبا رەتىندە جاسىرىلعان قارجى پيراميداسىنىڭ قىزمەتى توقتاتىلدى، دەپ حابارلايدى Bairaqmedia.kz.

اقپاراتقا سايكەس، ءوزىن ەلەكتروساموكاتتاردى جالعا بەرۋمەن اينالىساتىن امەريكالىق كومپانيا رەتىندە تانىستىرعان بۇل ۇيىم ازاماتتارعا كۇن سايىن 12-دەن 690 اقش دوللارىنا دەيىن تابىس تابۋدى ۋادە ەتكەن. سونداي-اق، جاڭا ينۆەستورلاردى تارتقانى ءۇشىن كريپتوۆاليۋتا تۇرىندە بونۋستار ۇسىنىلعان. الايدا ءىس جۇزىندە تولەمدەر جاڭا سالىمشىلاردىڭ قاراجاتىنان جۇزەگە اسىرىلىپ وتىرعان، بۇل قارجى پيراميداسىنىڭ ايقىن بەلگىلەرىن كورسەتەدى.

الاياقتىق سحەما سالدارىنان 100-دەن استام ادام زارداپ شەكتى. تارتىلعان قاراجاتتىڭ جالپى سوماسى – 197 ملن تەڭگە. ۇرلانعان اقشا كريپتوۆاليۋتا ءامياندارىنا، سودان كەيىن جەكە بانك شوتتارىنا اۋدارىلعان. قىلمىستىق ءىس اياسىندا 70 ملن تەڭگەدەن استام سوماعا مۇلىككە تىيىم سالىندى. تەرگەۋ اياقتالىپ، قىلمىستىق ءىس سوتقا جولداندى، – دەلىنگەن حابارلامادا.

اقتوبە وبلىسىنىڭ پروكۋراتۋراسى ازاماتتاردى ساق بولۋعا جانە كۇماندى كاسىپورىندارعا قاراجات سالماۋعا شاقىرادى.