بۇگىن 26 ناۋرىزدان 27 ناۋرىزعا قاراعان ءتۇن — ءقادىر ءتۇنى، دەپ حابارلايدى Bairaqmedia.kz.

قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي تاعان ۇلىنىڭ ايتۋىنشا، ءقادىر ءتۇنى — قاسيەتتى، تاعدىر، تارىلۋ دەگەن ماعىنالاردى بىلدىرەدى. 

اللا تاعالا قۇراندا: «ءبىز شىنىندا، قۇراندى ءقادىر تۇنىندە تۇسىردىك. ءقادىر ءتۇنىنىڭ نە ەكەنىن بىلەسىڭ بە؟ ءقادىر ءتۇنى (قاسيەت جانە ساۋاپ جاعىنان) مىڭ ايدان دا قايىرلى. سول تۇندە پەرىشتىلەر جانە جابىرەيىل اللانىڭ امىرىمەن (جەر بەتىنە اللا تاعدىر ەتكەن) بارلىق ىستەردى اتقارۋ ءۇشىن تۇسەدى. سول ءبىر ءتۇن، اعارىپ تاڭ اتقانعا دەيىن اماندىق-تىنىشتىق ءتۇنى بولادى» («ءقادىر» سۇرەسى، 1-5-اياتتار) دەپ باياندايدى.

راسىندا، رامازان ايىنىڭ قاسيەتتى بولۋىنىڭ ۇلى ەرەكشەلىكتەرىنىڭ ءبىرى – ءقادىر تۇنىندە تاعدىردىڭ جازىلۋى. ال ءقادىر ءتۇنىنىڭ قاسيەتتى بولۋىنىڭ ءمانى – ادامزات بالاسىن ەكى دۇنيە باقىتىنا جەتەلەۋشى قاسيەتتى كىتابىمىز قۇراننىڭ ءتۇسۋى، – دەيدى باس ءمۇفتي.

ءقادىر تۇنىندە جاساۋعا كەڭەس بەرىلەتىن امالدار:

- قۇران سۇرەلەرىن وقۋ؛

- دۇعا جاساۋ؛

- يستيعفار ايتۋ (كەشىرىم سۇراۋ)؛

- ساداقا بەرۋ؛

- زىكىر ايتۋ (اللانى ەسكە الۋ) – بۇل تۇندە «سۋبحاناللاح»، «اللاحۋ اكبار»، «ءاشھادۋ ءان ءلا ءيلاھا يللاللاح» دەگەن سوزدەر جۇرەكتەردى تازالاپ، اللانىڭ راقىمىنا جاقىنداتادى.