رەسەي پرەزيدەنتى ۆلاديمير پۋتين اقش باسشىسى دونالد ترامپقا ماسكەۋدىڭ كييەۆتەن تەرريتوريادان باس تارتۋدى تالاپ ەتۋدى جالعاستىرىپ وتىرعانىن مالىمدەدى، دەپ حابارلايدى Qaz365.kz.
بۇل تۋرالى Bloomberg پەن The New York Times (NYT) باسىلىمدارى جازدى. ال Financial Times (FT) دەرەككوزدەرىنىڭ ايتۋىنشا، رەسەي ليدەرى دونەسك وبلىسى ءۇشىن تەرريتوريالىق تالاپتارىن جۇمسارتۋعا دايىن ەكەنىن بىلدىرگەن.
15 تامىزدا الياسكادا وتكەن پۋتين مەن ترامپتىڭ كەلىسسوزدەرىنەن كەيىن ەندى 18 تامىزدا ۆاشينگتوندا اقش پەن ۋكراينا پرەزيدەنتتەرىنىڭ كەزدەسۋى جوسپارلانعان. Bloomberg، NYT جانە FT دەرەككوزدەرىنىڭ مالىمەتىنشە، ترامپ تەلەفون ارقىلى ۋكراينا پرەزيدەنتى ۆلاديمير زەلەنسكييگە ءپۋتيننىڭ دونباستان باس تارتۋ جونىندەگى تەرريتوريالىق تالابىن جەتكىزگەن.
زەلەنسكيي الەۋمەتتىك جەلىدەگى ح پاراقشاسىندا ترامپپەن «ءبىر جارىم ساعاتقا سوزىلعان ۇزاق ءارى مازمۇندى اڭگىمە» بولعانىن جازدى. اڭگىمە باستالعاننان ءبىر ساعاتتان كەيىن وعان ۇلىبريتانيا، فرانسيا، گەرمانيا، يتاليا، فينليانديا ەلدەرىنىڭ، سونداي-اق ناتو مەن ەۋروپالىق كوميسسيانىڭ باسشىلارى قوسىلعان.
امەريكالىق Axios پورتالىنىڭ دەرەككوزىنە سۇيەنسەك، ۋكراينا مەن اقش پرەزيدەنتتەرىنىڭ تەلەفون اڭگىمەسى «وڭاي بولماعان». دەگەنمەن، اقش پرەزيدەنتىنىڭ ءوزى پۋتينمەن كەزدەسۋىن دە، زەلەنسكييمەن سويلەسۋىن دە «وتە جاقسى ءوتتى» دەپ سيپاتتاعان. Bloomberg دەرەككوزدەرى ترامپتىڭ پۋتينمەن كەزدەسۋىن «ءونىمدى» دەپ اتاپ، ول كەيىن زەلەنسكييگە مامىلەگە كەلۋدى ۇسىناتىنىن، ءسويتىپ ۋكراينا باسشىسىنا قىسىمدى كۇشەيتەتىنىن جەتكىزگەنىن جازدى.
NYT دەرەككوزدەرى دە تەلەفون ارقىلى ەۋروپالىق ليدەرلەرمەن سويلەسكەن ترامپ پۋتين قويعان شارتتاردى قولداعانىن، ولاردى ورىنداۋ سوعىستى ۋاقىتشا ءبىتىمسىز-اق «جىلدام» اياقتاۋعا مۇمكىندىك بەرەدى دەپ مالىمدەگەنىن ايتادى. دەرەككوزدەردىڭ سوزىنشە، بۇل شارتتارعا ۋكراينا ءقازىر رەسەي باقىلاۋىنا وتپەگەن دونباستىڭ باتىس بولىگىنەن دە باس تارتۋ كىرەدى.
FTء-تىڭ الياسكاداعى كەلىسسوزدەر بارىسىمەن تانىس ءتورت دەرەككوزىنە سۇيەنسەك، ۋكراينا دونباستان باس تارتقان جاعدايدا پۋتين حەرسون مەن زاپوروجە وبلىستارىنداعى قازىرگى مايدان شەبىن «مۇزداتۋعا» دايىن ەكەنىن بىلدىرگەن، ءارى ۋكراينا قارۋلى كۇشتەرىنىڭ باقىلاۋىندا تۇرعان جەرلەرگە ەندى تالاپ قويمايتىنىن ايتقان.
Axios دەرەككوزى: «اسەر قالدىرعانى – تەرريتورياعا ايىرباس رەتىندە پۋتين [اسكەري وپەراسيانى] توقتاتۋعا جانە ۋكراينا اۋماعىنداعى جاڭا جەرلەردى باسىپ الۋعا نەمەسە باسقا ەلدەرگە شابۋىل جاساۋعا تالپىنبايتىنىنا كەپىلدىك بەرۋگە دايىن سياقتى كورىندى»، - دەيدى.
ول سونىمەن بىرگە ترامپتىڭ زەلەنسكييگە ءپۋتيننىڭ رەسەيلىك اسكەردىڭ بارلىق باعىتتا ايتارلىقتاي ىلگەرىلەۋى تۋرالى ءسوزىن جەتكىزگەنىن، رەسەي قالاسا، ءقازىر شايقاس ءجۇرىپ جاتقان بارلىق اۋدانداردى باقىلاۋعا الا الاتىنىن ايتقانىن حابارلادى. Axios-تىڭ جازۋىنشا، زەلەنسكيي بۇل سيپاتتامانى «شىنايىلىقتان الشاق» دەپ اتاعان.
پۋتينمەن كەزدەسۋدەن كەيىن ترامپ «كوپتەگەن ماسەلەلەر بويىنشا كەلىسىمگە كەلگەنىن، ءبىراق بارلىق ماسەلە بويىنشا ەمەس» ەكەنىن ايتىپ، «ەندى ونى پرەزيدەنت زەلەنسكيي شەشۋى ءتيىس» دەپ، ۋكراينا باسشىسىن ىمىراعا شاقىردى.
بۇعان دەيىن زەلەنسكيي بىرنەشە رەت دونباستى رەسەيگە بەرۋدىڭ مۇمكىن ەمەستىگىن، مۇنىڭ ەل كونستيتۋسياسىنا قايشى ەكەنىن مالىمدەگەن بولاتىن. الايدا اقش پرەزيدەنتىمەن سويلەسكەننەن كەيىن ول الەۋمەتتىك جەلىدەگى ح پاراقشاسىندا: «ۋكراينا بەيبىتشىلىككە قول جەتكىزۋ ءۇشىن بار كۇشىن سالۋعا دايىن ەكەنىن راستايدى»، - دەپ جازدى. FT دەرەككوزدەرىنىڭ ايتۋىنشا، دۇيسەنبى كۇنى وتەتىن ترامپپەن كەزدەسۋ بارىسىندا زەلەنسكيي «تەرريتوريالىق ماسەلەلەردى تالقىلاۋعا اشىق» بولماق.
