كوركەم گيمناستيكادان قازاقستان ۇلتتىق قۇراماسىنىڭ باس باپكەرى قىزمەتىنە لولا ادىلبەكوۆا تاعايىندالدى، دەپ حابارلايدى Bairaqmedia.kz.

لولا يسلامقۇل قىزى ادىلبەكوۆا – حالىقارالىق دارەجەدەگى سپورت شەبەرى، الەم چەمپيوناتتارىنىڭ قاتىسۋشىسى جانە 2002 جىلعى ازيا ويىندارىنىڭ كوماندالىق ەسەبىندە كۇمىس جۇلدەگەرى.

ادىلبەكوۆا باپكەرلىك قىزمەتىن 2010 جىلى شىمكەنت قالاسىندا باستاعان. سوڭعى جىلدارى ول شىمكەنت قالاسىنىڭ اعا جاتتىقتىرۋشىسى قىزمەتىن اتقاردى. 2018 جىلى وعان «قازاقستاننىڭ ەڭبەك سىڭىرگەن جاتتىقتىرۋشىسى» اتاعى بەرىلدى.

قىزمەت ەتۋ جولىندا لولا ادىلبەكوۆا حالىقارالىق ارەنادا قازاقستان اتىنان ونەر كورسەتكەن ءبىرقاتار تالانتتى سپورتشىنى دايىندادى. ولاردىڭ قاتارىندا: ازيا چەمپيونى جانە ازيا ويىندارىنىڭ كوماندالىق جارىستارىنىڭ جەڭىمپازى دايانا ابدىربەكوۆا، جاسوسپىرىمدەر اراسىنداعى وليمپيادانىڭ قاتىسۋشىسى روزا ءابيتوۆا، جاسوسپىرىمدەر اراسىنداعى الەم چەمپيوناتىنىڭ ءفيناليسى ەلجانا تانييەۆا، 2023 جىلعى ازيا ويىندارىنىڭ كوماندالىق جارىسىندا كۇمىس جۇلدەگەر اتانعان جانە جەكەلەي كوپسايىستا قولا مەدال يەلەنگەن ميلانا پارفيلوۆا بار.

ايتا كەتسەك، لولا ادىلبەكوۆا بۇل قىزمەتكە گيمناستيكا فەدەراسياسىنىڭ پرەزيدەنتى رەتىندە جۇمىسىن جالعاستىرۋدى ءجون كورىپ، باس باپكەر لاۋازىمىنان كەتكەن ءاليا يۋسۋپوۆانىڭ ورنىنا كەلدى.