بۇگىن جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى كەزەكتى سوت وتىرىسى باستالدى، دەپ حابارلايدى Bairaqmedia.kz.
سوتتا ءىس بويىنشا كۇدىكتىلەردىڭ سوت زالىنان كۇلىپ شىققان ۆيدەوسى تالقىلاندى. اتالعان كادرلار الەۋمەتتىك جەلىدە نارازىلىق تولقىنىن تۋدىرعان بولاتىن. سوتتا بۇل بەينەجازبانى كىم تۇسىرگەنى جانە ول قالاي ينتەرنەتكە تاراپ كەتكەنى جونىندە ماسەلە كوتەرىلدى.
ايىپتالۋشىلاردىڭ ءبىرىنىڭ اكەسى ءتۇسىرىلىمدى سوت زالىندا وتىرعان بەلگىسىز جاس جىگىت جۇرگىزگەنىن ايتتى. ونىڭ سوزىنشە، ول ۆيدەوعا تەك ايىپتالۋشىلاردى عانا ەمەس، كامەلەتكە تولماعان بالانى دا ءتۇسىرىپ العان.
بۇل بويىنشا سوت تەكسەرۋ جۇرگىزىلىپ جاتىر. ونىڭ ناتيجەسى قوسىمشا حابارلاناتىن بولادى، – دەدى سۋديا ەرجان جانۇزاقوۆ.
ايتا كەتسەك، تالعاردا كىسى قولىنان قازا تاپقان شەرزات پولاتتىڭ ولىمىنە قاتىستى قىلمىستىق ءىس 62 تومنان تۇرادى، ال ايىپتالۋشىلار ورىندىعىندا 9 ادام بار، ولاردىڭ ءبىرى كامەلەتكە تولماعان.
