الياسكادا رەسەي باسشىسى ۆلاديمير پۋتين مەن اقش پرەزيدەنتى دونالد ترامپ اراسىندا كەلىسسوزدەر ءوتتى.

كەزدەسۋ 2 ساعات 45 مينۋتقا سوزىلدى. كەلىسسوزدەر شاعىن قۇرامدا، "ۇشتە ءۇش" فورماتىندا ءوتتى. كەزدەسۋگە ەكى پرەزيدەنتتەن بولەك اقش-تىڭ مەملەكەتتىك حاتشىسى ماركو رۋبيو جانە ترامپتىڭ ارنايى وكىلى ستيۆ ۋيتكوفف، رەسەي تاراپىنان ەلدىڭ سىرتقى ىستەر ءمينيسترى سەرگەي لاۆروۆ پەن ءپۋتيننىڭ كومەكشىسى يۋريي ۋشاكوۆ قاتىستى.

تاراپتار ۋكراينا قاقتىعىسىن رەتتەۋدىڭ كەيبىر تارماقتارى تۋرالى تۇسىنىككە قول جەتكىزدى. جاڭا كەزدەسۋ تۋرالى دا كەلىستى.

كەزدەسۋ قورىتىندىسى

كەزدەسۋ قورىتىندىسى بويىنشا وتكەن باسپا ءسوز ءماسليحاتىندا پرەزيدەنتتەر جۋرناليستەردىڭ سۇراقتارىنا جاۋاپ بەرمەدى. سوڭىندا ولار قول الىستى.

ۆلاديمير پۋتين ارىپتەسىنە الياسكاعا كەلۋ تۋرالى ۇسىنىسى ءۇشىن العىس ايتىپ، ولاردىڭ كەزدەسۋ ورنىنىڭ سيمۆولدىق ءمانىن اتاپ ءوتتى. بۇل ايماق ەكى ەلدى دە ءارتۇرلى كەزەڭدەردە تىعىز بايلانىستىردى. ەكىنشى دۇنيەجۇزىلىك سوعىس جىلدارىنداعى ىنتىماقتاستىق تا ايرىقشا ماڭىزدى بولدى – اتاپ ايتقاندا، تۇبەكتە كەڭەس ۇشقىشتارى جەرلەنگەن. پۋتين اقش بيلىگى مەن جەرگىلىكتى تۇرعىندارعا باتىرلاردىڭ رۋحىنا لايىقتى قۇرمەت كورسەتكەنى ءۇشىن ريزاشىلىعىن ءبىلدىردى. پۋتين اقش پەن رەسەي ورتاق تاريحى بار جاقىن كورشى ەكەنىن ەسكە سالدى.

سونداي-اق ول قاقتىعىستى رەتتەۋگە قوسقان ەڭبەگى ءۇشىن ترامپقا العىس ايتتى. تاراپتار اراسىندا تۇسىنىستىككە قول جەتكىزىلگەنىن اتاپ ءوتتى. رەسەي باسشىسى بۇل ۋكراينادا بەيبىتشىلىككە جول اشاتىنىنا ءۇمىتتى.

پۋتين رەسەيدىڭ ۋكراينا قاۋىپسىزدىگى جولىندا جۇمىس ىستەۋگە دايىن ەكەنىن مالىمدەدى.

"ۋكراين حالقى — ءبىزدىڭ باۋىرلاس حالقىمىز. رەسەي ۋكرايناداعى قاقتىعىستى توقتاتۋعا شىن نيەتىمەن مۇددەلى. داعدارىستىڭ بارلىق باستاپقى سەبەبى جويىلۋى ءتيىس. كييەۆ جانجالدى رەتتەۋگە باعىتتالعان پروگرەسكە كەدەرگى كەلتىرمەيدى دەپ ۇمىتتەنەمىز"، — دەدى پۋتين.

ازىرگە مامىلە بولعان جوق، ءبىراق وعان مۇمكىندىك بار

ماسكەۋ مەن ۆاشينگتون كەيبىر تارماقتار بويىنشا كەلىسىمگە كەلدى، دەدى ترامپ.

"ەڭ باستىسى – بىزدە بەيبىتشىلىككە قول جەتكىزۋگە جاقسى مۇمكىندىك بار"، – دەپ ەرەكشە اتاپ ءوتتى ول.

سونىمەن قاتار اقش باسشىسى ۋكرايناعا قاتىستى "ەڭ ماڭىزدى تارماق" بويىنشا رەسەيمەن كەلىسىم بولماعانىن ايتتى. دەگەنمەن ول قاي ماسەلە تۋرالى ءسوز بولىپ وتىرعانىن ناقتىلاعان جوق.

"ماقساتقا تولىق قول جەتكىزە المادىق. وكىنىشكە قاراي ازىرگە كەلىسىم جوق"، – دەپ مويىندادى ول.

ترامپ سونداي-اق كەزدەسۋدىڭ قورىتىندىلارىن ەۋروپالىق وداقتاستارىمەن جانە كييەۆپەن تالقىلايتىنىن ايتتى.

وسىلايشا پرەزيدەنتتەر سوزدەرىن اياقتادى. باسپا ءسوز ءماسليحاتىنان كەيىن جۋرناليستەر تاعى ءبىر جاڭالىقتى ءبىلدى. دەلەگاسيالار جوسپارلانعان تاڭعى اسقا بارمايتىن بولدى.

كەلىسسوزدەر جوسپارلانعان ۋاقىتتان ەرتەرەك اياقتالدى. ءبىراق سوعان قاراماستان، باتىس باق-تارىنىڭ باسىم بولىگى اتاپ وتكەندەي، پۋتين مەن ترامپ "توعىساتىن نۇكتەلەردى تابا الدى" جانە بەيبىتشىلىككە قاراي ماڭىزدى قادام جاسادى.