UFC جەكپە-جەك شەبەرى شاۆكات راحمونوۆتىڭ باس باپكەرى ەدۋارد بازروۆ سپورتشىنىڭ جاعدايى مەن قايعىلى جول اپاتىنان كەيىن وكتاگونعا قايتا ورالۋعا دايىندىعى تۋرالى ايتىپ بەردى، دەپ حابارلايدى bairaqmedia.kz.

«شاۆكاتقا قاتىستى جاعداي بويىنشا ناقتى ەشتەڭە ايتا المايمىن. ءبىر عانا نارسەنى ايتا الامىن – شاۆكات جاتتىعۋ جاساپ ءجۇر. ارينە، جاعداي وتە اۋىر... پسيحولوگيالىق تۇرعىدا دا ءوزىڭدى جۇمىسقا بەيىمدەۋ قيىن. ءبىراق شاۆكات – مىنەزدى جىگىت. ول كەلەدى، قولىنان كەلگەنشە جاتتىعىپ ءجۇر. الداعىنى بولجاپ ايتا المايمىن. مۇنداي جاعدايدا ءار ادام ءارتۇرلى ارەكەت ەتۋى مۇمكىن. ءبىراق قازىرگى جاعدايدى ايتىپ وتىرمىن. ول جاتتىعۋىن جالعاستىرىپ جاتىر. ال بولاشاقتى ءبىر اللا عانا بىلەدى»، – دەدى باپكەر.

قايعىلى وقيعا 27 شىلدە كۇنى الماتى – ەكاتەرينبۋرگ تراسساسىندا بولعان. الەۋمەتتىك جەلىلەردەگى اقپاراتقا سايكەس، كولىكتەردىڭ ءبىرىن سپورتشىنىڭ جۇبايى گۇلايىم راحمونوۆا جۇرگىزگەن. جامبىل وبلىستىق پوليسيا دەپارتامەنتىنىڭ باسپا ءسوز قىزمەتى گۇلايىم راحمونوۆانىڭ ءىس بويىنشا كۋاگەر مارتەبەسىندە ەكەنىن ناقتىلادى.