تانزانيا تۇرعىنى كەۋدە تۇسىنا كىرىپ كەتكەن پىشاقپەن سەگىز جىل ءومىر ءسۇرىپ كەلگەن، دەپ جازادى Azattyq Rýhy.

The Sun باسىلىمىنىڭ مالىمەتىنشە، تانزانيادا ەر ادام مۋحيمبيلي ۇلتتىق اۋرۋحاناسىنا وڭ جاق كەۋدە استىنان ءىرىڭ بولىنۋىنە شاعىمدانىپ جۇگىنگەن. الايدا ونىڭ كەۋدە تۇسىندا اۋىرسىنۋى دا، تىنىس الۋدا قينالۋى دا، جوتەل نەمەسە قىزۋى دا بولماعان. ومىرلىك كورسەتكىشتەرى قالىپتى بولعاندىقتان، بۇل جاعداي دارىگەرلەردى تاڭعالدىردى.

العاشىندا قابىنۋدىڭ سەبەبى تۇسىنىكسىز بولىپ تۇردى. كەيىن پاسيەنت سەگىز جىل بۇرىن بولعان جانجالدى ەسىنە ءتۇسىردى. سول كەزدە ول بەتى، ارقاسى، كەۋدەسى مەن ىشىنەن كوپتەگەن جاراقات الىپ، مەديسينالىق كومەككە جۇگىنگەن. ءبىراق ونىڭ كەۋدە قۋىسىندا پىشاق قالىپ قويعانىن رەنتگەن جاساعانعا دەيىن ءوزى دە بىلمەگەن.

دارىگەرلەردىڭ ايتۋىنشا، پىشاق ءجۇزى جۇرەك، وكپە جانە ءىرى قان تامىرلارىن جاناپ وتكەن.

«ول ءسال عانا قوزعالعاندا، ءومىرىن ساقتاپ قالۋ مۇمكىن بولماس ەدى»، – دەيدى دارىگەرلەر.

حيرۋرگتەر كۇردەلى وتا جاساپ، پىشاقتى اسقان ساقتىقپەن الىپ تاستادى، سونداي-اق تىندەردىڭ نەكروزىنان پايدا بولعان ءىرىڭدى شىعاردى. پاسيەنت 24 ساعاتىن جانساقتاۋ بولىمىندە وتكىزىپ، كەيىن دارىگەرلەردىڭ باقىلاۋىمەن 10 كۇن جالپى پالاتادا ەمدەلدى.

ەسەپكە سايكەس، ارى قارايعى قالپىنا كەلۋى ەش اسقىنۋسىز ءوتتى. دارىگەرلەر مۇنداي جاعدايلاردىڭ وتە سيرەك كەزدەسەتىنىن اتاپ ءوتىپ، ونى «ادام اعزاسىنىڭ تاڭعالارلىق توزىمدىلىگىنىڭ ۇلگىسى» دەپ باعالادى.