پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ جۇمىس وتىرىسى ءوتتى، دەپ حابارلايدى Bairaqmedia.kz.
جيىندا تاريفتىك قاقتىعىستار سالدارىنان الەمدىك نارىقتاعى جاعدايدىڭ وزگەرۋىنە بايلانىستى ەلىمىزدىڭ ءىس-قيمىل جوسپارى تالقىلاندى.
پرەمەر-مينيستر ولجاس بەكتەنوۆتىڭ، ۇلتتىق بانك ءتوراعاسى تيمۋر سۇلەيمەنوۆتىڭ، سونداي-اق باسقا دا قۇزىرەتتى ورگاندار باسشىلارىنىڭ باياندامالارى تىڭدالدى.
پرەزيدەنت قازىرگى جاھاندىق ەكونوميكاداعى احۋالدىڭ تۇراقسىز سيپات الا باستاعانىن، سوندىقتان كەز كەلگەن جاعدايعا دايىن بولۋ قاجەت ەكەنىن اتاپ ءوتتى.
كەڭەس وتىرىسىندا قاسىم-جومارت توقايەۆ الداعى جۇمىستىڭ نەگىزگى باعىتتارىن ايقىندادى.
– ۇكىمەتتىڭ مىندەتى – حالىقتىڭ ءال-اۋقاتىن، ەكونوميكالىق ءوسىم قارقىنىن جانە تارتىلاتىن ينۆەستيسيا كولەمىن تومەندەتۋگە جول بەرمەۋ، – دەدى مەملەكەت باسشىسى.
پرەزيدەنت الەمدىك دەڭگەيدەگى داعدارىستار ءاردايىم سىن-قاتەرگە تولى بولعانىمەن، دامۋدىڭ جاڭا كوكجيەگىن اشاتىنىن دا ايتتى.
مەملەكەت باسشىسى قازاقستاننىڭ ەكونوميكالىق، كولىك-لوگيستيكالىق جانە ادامي الەۋەتىن نىعايتۋعا ىقپال ەتەتىن ناقتى ستراتەگيالىق باعىتتاردى اتادى.
ءىرى ينفراقۇرىلىمدىق جوبالار مەن سيفرلاندىرۋ جوسپارى ەلىمىزدىڭ ەكونوميكالىق ساياساتىنىڭ باستى باعىتتارى بولىپ قالا بەرەدى.
– حالىق الدىنداعى نەگىزگى الەۋمەتتىك مىندەتتەمەلەردىڭ ءبارىن ورىنداۋعا جانە ماڭىزدى ينفراقۇرىلىمدىق جوبالاردى جۇزەگە اسىرۋدى جالعاستىرۋعا ءتيىسپىز، – دەدى پرەزيدەنت.
مەملەكەتتىڭ قارجىلىق تۇراقتىلىعىن ساقتاۋ مەن اقشا-نەسيە ساياساتىن ىسكە اسىرۋ تەتىكتەرىن جەتىلدىرۋگە ەرەكشە نازار اۋدارىلدى.
جيىن سوڭىندا پرەزيدەنت مەملەكەتتىك ورگاندارعا ءبىرقاتار ناقتى تاپسىرما بەردى.
