مانەرلەپ سىرعاناۋدان الەم چەمپيوناتىنىڭ كۇمىس جۇلدەگەرى ميحايل شايدوروۆتىڭ دايىندىق جاعدايىنا قاتىستى مالىمدەمەسىنەن كەيىن تۋريزم جانە سپورت مينيسترلىگى رەسمي تۇردە تۇسىنىكتەمە بەردى، دەپ حابارلايدى bairaqmedia.kz.

مينيسترلىك وتاندىق جەتەكشى سپورتشىنىڭ ءبىرى — ميحايل شايدوروۆتىڭ جارىستارعا دايىندالۋعا ءتيىستى جاعدايدىڭ بولماۋىنا قاتىستى جاعدايدان حاباردار. بۇل جاعداي مەملەكەت باسشىسىنىڭ سپورت سالاسىنداعى ۆەرتيكالدى باسقارۋدى قالپىنا كەلتىرۋ جونىندەگى تاپسىرماسىنىڭ ورىندى ءارى دەر كەزىندە بەرىلگەنىن تاعى ءبىر مارتە دالەلدەيدى. اتالعان رەفورمانىڭ نەگىزگى باعىتتارىنىڭ ءبىرى — جوعارى جەتىستىكتەر سپورتىنا ارنالعان سپورت نىساندارىن جەرگىلىكتى اتقارۋشى ورگانداردان مينيسترلىك قاراماعىنا بەرۋ. مينيسترلىك ۇلتتىق قۇرامانى وليمپياداعا دايىنداۋ جوسپارىن بەكىتتى. وسى جوسپار اياسىندا مەدال الۋعا ۇمىتكەر سپورتشىلاردى انىقتادى. ولاردىڭ ءارقايسىسىنا، سونىڭ ىشىندە ميحايل شايدوروۆقا دا، جاۋاپتى قۇرىلىمدارعا ناقتى مىندەتتەر جۇكتەلدى، – دەلىنگەن حابارلامادا.

جوسپارعا سايكەس جاۋاپتى قۇرىلىمداردىڭ مىندەتتەرى بەلگىلەنگەن:

• سپورتتى دامىتۋ ديرەكسياسى (سدد): جەكە دايىندىق جوسپارلارىنىڭ ورىندالۋىن باقىلاپ، بارلىق تاراپتاردىڭ ءوزارا ءىس-قيمىلىن ۇيلەستىرەدى.

• سپورت فەدەراسيالارى: بىلىكتى جاتتىقتىرۋشىلار قۇرامىن، حالىقارالىق جيىندار مەن جارىس تاجىريبەسىن قامتاماسىز ەتەدى.

• وڭىرلىك اكىمدىكتەر: سپورتشىلارعا تۇرۋ، تاماقتانۋ جانە جاتتىعۋ ءۇشىن قاجەتتى بازالىق جاعدايلار جاسايدى.

• سپورتتىق مەديسينا جانە وڭالتۋ ورتالىعى: مەديسينالىق-بيولوگيالىق قولداۋ مەن وڭالتۋ شارالارىن قامتاماسىز ەتەدى.

• عىلىمي-ادىستەمەلىك سۇيەمەلدەۋ: دايىندىق باعدارلامالارىنىڭ تيىمدىلىگىن باعالاپ، ۇسىنىستار بەرەدى.

بۇدان بولەك، سپورتشىلاردى دايىنداۋعا قاتىسى بار باسقا دا مەكەمەلەر جۇمىسقا تارتىلعان. مينيسترلىك ءاربىر سپورتشىعا، ونىڭ ىشىندە ميحايل شايدوروۆقا دا، تۇراقتى تۇردە قاجەتتى قولداۋ كورسەتىلەتىنىن اتاپ ءوتتى. سپورتشىنىڭ قاي جەردە تۇراتىنىنا نەمەسە تىركەلگەن مەكەنجايىنا قاراماستان، بارلىق جاعدايلار قاراستىرىلاتىن بولادى.

ايتا كەتسەك، بۇعان دەيىن مانەرلەپ سىرعاناۋدان الەم چەمپيوناتىندا كۇمىس مەدال جەڭىپ العان ميحايل شايدوروۆ باق-قا بەرگەن سۇحباتىندا اقش، جاپونيا جانە وڭتۇستىك كورەيانىڭ جەتەكشى سپورتشىلارى سياقتى دايىندىق ءۇشىن جاعدايى جوق ەكەنىن ايتقان بولاتىن.