شىمكەنتتە اكىم ورىنباسارى رۋسلان بەردەنوۆكە وق اتقان ەرنار جيەنباي سوت ۇكىمىمەن كەلىسپەيتىنىن ايتىپ، جۋرناليستەردىڭ سۇراعىنا جاۋاپ بەردى، دەپ حابارلايدى bairaqmedia.kz.

“ۇكىممەن كەلىسپەيمىن. مەنىڭ ءولتىرۋ نيەتىم بولماعان. ول رۋسلاننىڭ قورقىنىشتان ايتىپ جاتقان ساندىراعى دەپ ويلايمىن. وزدەرىڭىز ۆيدەودان كوردىڭىزدەر. مەن ونى ولتىرەتىن بولسام، ەشقايدا قاشىپ قۇتىلماس ەدى. 9 جىل بولسا – 9 جىل! ءبىراق ادام ءولتىرۋ ەمەس، 106 باپ – ادام ومىرىنە قاساقانا زيان كەلتىرۋ بابىمەن سوتتاۋ كەرەك ەدى. ناقتى ايعاقتالعان قىلمىس – سول. دەنساۋلىعىنا اۋىر زيان كەلگەن، بيولوگيالىق ءولىم كەلمەگەن. اپەللياسيالىق شاعىم تۇسىرەتىنىمدى ايتا المايمىن”، – دەدى ەرنار جيەنباي سوت ۇكىمى وقىلعان سوڭ جۋرناليستەرگە بەرگەن جاۋابىندا.

سوتتالۋشى ەرنار جيەنباي رۋسلان بەردەنوۆ ءبىرىنشى وزىنە شاقىرعانىن، دورەكىلىك كورسەتكەنىن ايتتى.

“سەن تۋپويسىڭ، شاشىڭ ءتۇسىپ قالعان” دەپ كادىمگىدەي تۇرىپ جاعامنان ۇستادى، ءبىراق ونى كومەكشىلەرى ايتپايدى. وزدەرىڭىز كوردىڭىزدەر عوي، كومەكشىسى دە، قۇرىلىس باسقارما باسشىسىنا ايتقان: “جيەنبايدى سوتتاتامىن، سەبەبى كومەكشىمە مىنەز كورسەتتى” دەگەن. مەن ول كىسىنى ىزدەگەن سەبەبىم – ول كىسى فوربستا تۇرعان، بيلىكتە ادامى كوپ، ءماجىلىس دەپۋتاتى بولعان ادام. مەن ۇرىستى توقتاتۋ ماقساتىندا اراعا ادام سالىپ، ەكىنشى كەزدەسۋگە كىرۋىمنىڭ سەبەبى – جۇمىستا قالدىرۋ ەمەس، “مەنى سوتتاتپاڭىز” دەپ كەشىرىم سۇراۋ ماقساتىندا كىرگەنمىن. سول كىرگەن كەزىمدە بولعان وقيعا ەدى”، – دەيدى ەرنار جيەنباي.