الماتىدا جانە اباي وبلىسىندا جانار-جاعارماي ماتەريالدارىنىڭ (ججم) زاڭسىز اينالىمىنىڭ ءىرى فاكتىسىنىڭ جولى كەسىلدى، دەپ حابارلايدى Bairaqmedia.kz. 

قارجى مينيسترلىگىنىڭ مەملەكەتتىك كىرىستەر كوميتەتىنىڭ مالىمەتىنشە، 2025 جىلعى 30 ساۋىردە الماتى قالاسىنداعى مۇناي بازالارىنىڭ بىرىندە تەكسەرۋ ءىس-شارالارى بارىسىندا 35 ميلليون تەڭگەدەن استام كولەمدە 177 مىڭ 100 ليتر ججم انىقتالعان. ونىمدەر رەزەرۆۋارلاردا، بەنزين تاسىمالداۋ كولىكتەرىندە جانە پلاستيك ىدىستاردا ءتيىستى قۇجاتتارسىز ساقتالعان. ماتەريالدار پروسەستىك شەشىم قابىلداۋ ءۇشىن الماتى قالاسىنىڭ ەكونوميكالىق تەرگەۋ دەپارتامەنتىنە جولداندى.

بۇعان دەيىن، 2025 جىلعى 25 ساۋىردە، سەمەي قالاسىندا (اباي وبلىسى) جۇرگىزىلگەن جوسپاردان تىس سالىقتىق تەكسەرۋ ناتيجەسىندە سالىق ەسەبىنە الىنباعان، قىزمەتتى زاڭسىز جۇزەگە اسىرعان، تىركەلمەگەن اۆتوجانارماي قۇيۋ ستانسياسى انىقتالدى. قۇنى شامامەن 19 ميلليون تەڭگە 70 توننادان استام مۇناي ونىمدەرى الىندى. ماتەريالدار اباي وبلىسىنىڭ ەكونوميكالىق تەرگەۋ دەپارتامەنتىنە جولداندى.