Vatıkanda jańa Rım Papasyn saılaý úshin konklav bastaldy dep habarlaıdy bairaqmedia.kz

Bul shirkeý tarıhyndaǵy 267-shi Papa bolmaq. Jańa Papany tańdaý prosesi áýlıe Petr shirkeýinde saltanatty messa ótkizýmen bastaldy. Qyzyl mantıa kıgen kardınaldar shirkeý ishinen ótip, Sıkstın kapelasyna jınaldy.

Bıylǵy konklavta rekordtyq kórsetkish tirkelip, 70 elden 133 kardınal qatysady.

Saılaý barysynyń qupıalyǵyn qamtamasyz etý úshin Vatıkan qatań erejeler engizdi. Kardınaldarǵa syrtqy álemmen baılanysýǵa tyıym salynǵan, sonymen qatar tyńdaý quraldarynyń jumysyna kedergi keltiretin joǵary tehnologıaly jabdyq qoldanylýda.

Alǵashqy otyrysta bir ǵana daýys berý ótkiziledi. Erteńnen bastap kardınaldar kúnine tórt retke deıin daýys bere alady. Saılaý nátıjesiz aıaqtalǵan jaǵdaıda, Sıkstın kapelasynyń shatyrynan qara tútin shyǵady.

Al, jańa Papa saılanǵan jaǵdaıda, aq tútin shyǵyp, shirkeý qońyraýlary soǵylady. Bul álem boıynsha shamamen 1,5 mıllıard katolıktiń jańa rýhanı kóshbasshysy saılandy degendi bildiredi.

Eske sala keteıik, 2025 jyldyń 21 sáýirinde Rım Papasy Fransısk 88 jasynda ómirden ótken bolatyn.