Týrızm jáne sport mınıstri Erbol Myrzabosynov elordada Ulttyq sport ýnıversıtetiniń qurylysyn júrgizip jatqan shveısarıalyq Mabetex kompanıasynyń basshylyǵymen mańyzdy kezdesý ótkizdi. Taraptar jobanyń qazirgi kezeńi, qurylys jumystarynyń sapasy jáne ýnıversıtettiń bolashaq ınfraqurylymyn talqylady, dep habarlaıdy Bairaqmedia.kz. 

Kezdesýden keıin mınıstr bilim ordasynyń qurylys barysymen jáne jobanyń birinshi jáne ekinshi kezeńderiniń josparymen tanysty. Erbol Myrzabosynov qurylys jumystaryn sapaly ári belgilengen merzimde aıaqtaýdyń mańyzyn atap ótti. Jospar boıynsha ýnıversıtettiń alǵashqy kezeńi mamyryń sońyna qaraı paıdalanýǵa berilmek.

Qazir birinshi kezeń aıasyndaǵy qurylys jumystary aıaqtalýǵa jaqyn. Mamyrda kópfýnksıonaldy sport kesheni, stadıon, jeńil atletıka maneji, júzý baseıni, kolej ǵımaraty jáne 500 oryndyq jataqhana qoldanysqa beriledi. Bul – oqý prosesin bastaýǵa qajetti negizgi ınfraqurylym.

Joba tolyq iske qosylǵan kezde ýnıversıtet sport salasyndaǵy mamandardy daıarlaýdyń tolyqqandy júıesin – kolejden bastap doktorantýraǵa deıingi deńgeılerdi qamtıdy. Munda bir mezgilde 2000-nan astam stýdent pen 60-qa jýyq magıstrant jáne doktorant bilim alady.

Erbol Myrzabosynov atalǵan jobanyń iske asýy elimizdegi sporttyq bilim berý júıesine túbegeıli ózgeris engizip, halyqaralyq deńgeıdegi kásibı kadrlardy daıarlaýǵa jol ashatynyn aıtty.

«Ýnıversıtet ınfraqurylymy tek bilim berý mekemesi retinde ǵana emes, kópsalaly sporttyq jáne ǵylymı ortalyq retinde de qyzmet etedi. Bul óz kezeginde elimizdegi týrızm men sport salasynyń damýyna serpin berip, óńirlik jáne halyqaralyq yntymaqtastyqty nyǵaıtýǵa múmkindik beredi», – dedi Týrızm jáne sport mınıstri.