Úkimet rezervinen tyńaıtqyshtardy (organıkalyq tyńaıtqyshtardy qospaǵanda) sýbsıdıalaý úshin 48,4 mlrd teńge bólindi. Premer-mınıstr Oljas Bektenov tıisti qaýlyǵa qol qoıdy, dep habarlaıdy Bairaqmedia.kz. 

Qaýly memleket basshysynyń aýyl sharýashylyǵy jalpy óniminiń kólemin 2024-2028 jyldarǵa 2 ese ulǵaıtý jáne topyraqqa mıneraldy tyńaıtqyshtardy engizý deńgeıin ǵylymı negizdelgen qajettiliktiń 50%-na deıin arttyrý jónindegi tapsyrmalaryn iske asyrý sheńberinde qabyldandy.

Qujat rezervten tyńaıtqyshtardyń qunyn sýbsıdıalaýǵa aǵymdaǵy nysanaly transfertter túrinde Abaı, Aqmola, Shyǵys Qazaqstan, Jambyl, Qaraǵandy, Qostanaı, Pavlodar, Soltústik Qazaqstan jáne Túrkistan oblystarynyń ákimdikterine qarajat aýdarýyn kózdeıdi.

Birinshi kezekte, qarajattyń negizgi kólemi mıneraldy tyńaıtqyshtardy avanstyq sýbsıdıalaý tetigin iske asyrýǵa baǵyttalǵan. Ótken jyldyń naýryzynda AÓK-ni qoldaý sheńberinde tyńaıtqyshtardy avanstyq sýbsıdıalaý tetigi engizilgeni belgili. Bul rette búdjettik sýbsıdıalar aýyl sharýashylyǵy taýaryn óndirýshilerge arzandatylǵan tyńaıtqyshtardy jetkizý úshin otandyq zaýyttardyń arnaıy shottaryna aldyn ala aýdarylady.