"Habar" agenttiginiń baǵdarlamalar óndirisi bóliminiń shef-redaktory, esimi elge belgili telejýrnalıst Azat Rystanbek dúnıeden ozdy, dep habarlaıdy 24.kz.

Azat Sardarbekuly uzaq jyldar boıy qazaq televızıasynyń damýyna súbeli úles qosty. Kásibı sheber telemaman 2000 jyldary lańkestik uıymdar men qalyń sekta týraly beınematerıaldar jasady. Túrkistan legıony sapynda bolǵan jaýyngerlerdiń tarıhyn jazdy. Surapyl jyldary shekara asyp Anadolyǵa deıin jetken qaımana qazaqtyń joqshysy boldy.

Jeńistiń 85 jyldyǵyna oraı, sonaý Eýropanyń birneshe elin aralap, "Habar" arnasynyń kontent qorjynyn úsh bólimnen turatyn birtutas derekti fılmmen tolyqtyrdy. "Qarsylasý qozǵalysy", "Petsamo-Kırkenes operasıasy" jáne "Jat jurtta qalǵan jaýynger" dep atalǵan sıkldy derekti fılmderinde ekinshi Dúnıejúzilik soǵystyń qupıa saqtalǵan qujattaryn, aıtylmaǵan aqıqattaryn zerttedi.

Habar agenttiginiń 30 jyldyǵyna arnap ómirden ozǵan áriptesteri jaıynda “Esimderi esimizde” atty derekti fılm túsirdi. Azat Rystanbektiń qazaq televızıasyna sińirgen eleýli eńbegi eskerilip, "Halyq alǵysy" tósbelgisimen marapattalǵan. Prezıdenttiń alǵys hatyn ıelengen. Aqparat salasynyń úzdigin atanǵan.