Almatydaǵy Akademqalashyqta salynaıyn dep jatqan áleýmettik nysandardyń qurylysyna Májilis depýtaty Baqytjan Bazarbek aralasty, - dep habarlaıdy bairaqmedia.kz
Májilismen búgin turǵyndardyń shaǵymyn tyńdaýǵa keldi. Ári qurylys josparlanǵan aýmaqta memlekettik organdar, sondaı-aq qurylys kompanıasy qatysqan jıyn ótkizdi.
Bul aýmaqta bıznes ortalyq pen qonaqúı salý josparlanǵan. Alaıda, turǵyndar qurylysqa qarsy shyqqan edi. Sebebi, jańa nysandar ekologıaǵa keri áser etedi, aǵashtar otalady, ári tektonıkalyq jaryqtyń ústine salynady dep alańdaýshylyq bildirýde. Alaıda, narazy jurttyń seısmıkalyq qaýipsizdikke qatysty suraǵyna Seısmologıa ınstıtýtynan kelgen maman naqty jaýap berdi.
“Bul jerden tektonıkalyq jarylys ótip jatqan joq. Tektonıkalyq jarylys kósheniń ar jaǵynda, bul aýmaqtan 160 metr jerden ótip jatyr. Al osy jer 9 baldyq aımaqqa kiredi”, - dedi Seısmologıa ınstıtýty dırektorynyń ǵylym jónindegi orynbasary Aıgúl Danabaeva.
Jıynǵa qalalyq Sáýlet jáne qala qurylysy basqarmasynyń mamandary da shaqyrylǵan. Olar turǵyndardyń kókeıtesti suraqtaryna jaýap berdi. Sóıtse, Bas josparǵa sáıkes, bul komersıalyq aımaq eken. Iaǵnı, bıznes ortalyǵyn ne bolmasa qonaqúı salýǵa ruqsat.
“Bul jer ýchaskesi qazir SABA GROUP kompanıasynyń jeke menshik quqyǵynda. Aýmaq komersıalyq bolyp esepteledi. Bas jospardan keıin qurylatyn naqty josparlaý jobasyna sáıkes bul jerde komersıalyq bıznes ortalyq, qonaqúı kesheni t.b halyqqa qyzmet kórsetý nysandary qarastyrylǵan. Burynǵy menshik ıesine sáýlet josparlaý tapsyrmasy berilgen. Qazirgi tańda SABA GROUP kompanıasynda jobanyń aldyn ala qujattary joq, - dedi Almaty qalasy Sáýlet jáne qala qurylysy basqarmasynyń Bostandyq aýdany boıynsha bólim basshysy Beknar Berikuly.
Al, merdiger jer telimin jaqynda satyp alǵanyn aıtady. Iaǵnı, áli bir aıǵa da jetpegen. Sondyqtan, qujattaryn endi túgendep jatyr eken. Kompanıa ókilderi turǵyndardyń shaǵymyn eskerip, 9 qabatty bıznes ortalyqtyń bıiktigin tómendettik deıdi. Iaǵnı, endi 9 qabatty nysan salynbaıdy. 3 jáne 5 qabatty ǵımarattar boı kótermek. Sondaı-aq, halyqqa kishigirim saıabaq salyp berýdi de josparlap otyr.
“Qazir jobalyq-smetalyq qujattama ázirlenip jatyr. Qurylysty arnaıy talondy qolymyzǵa alǵannan keıin ǵana bastaımyz. Tıisti saraptamalardan ótken soń ǵana jumys bastalady”, - dedi SABA GROUP kompanıasynyń prezıdenti İlıas Káribozov.
