Semeıdegi perınataldy ortalyqta jańa týǵan shaqalaq kúıip qaldy, dep habarlaıdy Bairaqmedia.kz.

Anasynyń aıtýynsha, aıy-kúni jetip aman-esen bosanǵan náresteni aq halattylar kúıdirgen.

32 jastaǵy Kamal Orazǵalıeva ekinshi qańtarda shekesi torsyqtaı ul bosanǵan. Ómirge ákelgen tórtinshi balanyń salmaǵy – 4 keli 150 gram. Qazir kishkentaı Álıdiń denesiniń saý tamtyǵy joq. Qos jambasy men ıyǵy jáne arqasy úlbirep jatyr.

Bala týǵanda qalypty bolyp týdy. Eshqandaı aýrý, aýytqýy bolǵan joq. Toǵyz aı tolyq kóterdi. Áıelim esh aýrýmen aýyrǵan joq. Búkil anyqtamalary bar. Bala 4 keli 150 gram bolyp týdy. Boıy – 58 santımetr. Deni saý týylǵan bala, – deıdi ákesi Amangeldi Jumashev.

Ashynǵan ata-ananyń aıtýynsha, balasynyń kúıip qalǵanyn dárigerler 2 táýlik boıy jasyrǵan. Tek ekinshi kúni shaqalaqtyń jylytýǵa arnalǵan tósenishke kúıip qalǵanyn moıyndaǵan kórinedi. 

Dárigerlerdiń aıtýynsha, bala jylytýǵa arnalǵan tósenishke kúıip qalǵan. Men birden tómen túsip, qaradym. Artynsha olar jarany jaryp, hırýrgty shaqyrdy. Sondaı-aq, menen aıǵaı shý-shyǵarmaýymdy surady.  Osy kúnge deıin kúıkipen emdep kelgen bolatyn. Endi, tuqymnan berilýi múmkin, kúıik emes dep otyr, – deıdi anasy Kamal Orazǵalıeva.

Al, aq halattylar «sábıdi kúıdirmedik, bul tuqym qýalaıtyn dert bolýy múmkin» dep aqtalyp otyr. Biraq, onyń qandaı syrqat ekenin anyqtaýǵa shamalary jetpeı jatyr. Sondyqtan olar shaqalaqty dereý Astanaǵa attandyrmaq.

Basynda biz kúıik dep eseptedik. Ony joqqa shyǵarmaımyz. Sol dıagnozben Astanadaǵy dárigerlerge bárin aıttyq. Ony joqqa shyǵaryp otyrǵan eshkim joq. Qazir bul belgiler kúıikke uqsamaı jatyr. Qalypty jaǵdaıda kúıik degen 6 táýilikte jınalyp, jazylady, – deıdi Abaı oblysynyń bas neonatolog dárigeri Shynar Astaeva.