Ózbekstannyń Tashkent oblysynda jas kelin nekeden keıin nebári úsh kún ótkende kóz jumdy, dep habarlaıdy Anyqtime.kz.
Marqumnyń anasy qyzyn bireýler býyndyryp óltirdi dep sanaıdy, al kúıeýiniń týystary bul — óz-ózine qol jumsaý dep málimdep otyr. Oqıǵa qoǵamda úlken daý týǵyzdy, eki taraptyń da ýáji men resmı organdardyń qorytyndysy talqylanýda.
Ananyń aıtýynsha, ol bul máselege «Mıllar» teleshoýynda nazar aýdarýdy ótingen. 3 sáýirde qyzy Keles qalasyna uzatylǵan. Kúıeý jigittiń jaqyndary ózderiniń aýqatty áýlet ekenin aıtyp, qalyńdyqty ulyna berýdi ótingen soń, anasy egjeı-tegjeı teksermeı-aq nekege kelisim bergen. «Bul meniń jalǵyz qyzym. Kúıeýim bolmasa da, toıǵa kerektiniń bárin ózim jasadym. Mine, nebári úsh kún ótti, maǵan telefon soǵyp: «Qyzyńnyń súıegin alyp ket» deıdi. Tipti uıat ta joq», — deıdi ol kúıine sóılep.
Qaıǵyly jaǵdaı 6 sáýir kúni shamamen saǵat 18:00-de bolǵany aıtyldy. Anasy qyzynyń baqytty ómir súrip jatqanyn, jaqyndaryna vıdeolar joldap, qýanyp júrgenin alǵa tartyp: «Men ony tunshyqtyryp óltirgenine senimdimin. Ol óz-ózine qol jumsaıtyn adam emes edi. Qajet bolsa, shyndyqty dáleldeý úshin zıratyn ashýǵa da daıynmyn», — dep otyr.
Al kúıeý jigittiń týystary eshkimniń kinási joq ekenin aıtady. «İs qazirdiń ózinde jabylǵan. Sol kúni úıde eshkim bolǵan joq. Túskenine úsh kún bolǵan kelindi eshkim óltirmeıdi ǵoı», — deıdi enesi. Marqum turǵan mahallada qalyńdyqtyń otbasy «jaqsy, úlgili januıa» retinde sıpattalǵan. Jesir áıeldiń eki balasy bar ekeni, qyzyn jaqsy otbasyna turmysqa berý úshin qoldan kelgenniń bárin jasaǵany aıtylady.
Resmı derek boıynsha, Bas prokýratýra tekseris júrgizgennen keıin marqumnyń denesinen tunshyǵý belgileri anyqtalmaǵanyn habarlady. Tashkent oblysynyń prokýratýrasy ananyń aryzyn qarap shyqqannan soń, tergeýge deıingi tekserý nátıjesinde ózge tulǵalardyń áreketinen qylmys belgileri tabylmaǵanyn málimdep, osyǵan baılanysty qylmystyq is qozǵaýdan bas tartylǵanyn jetkizdi.
Degenmen, eki taraptyń qarama-qaıshy málimdemeleri qoǵamda rezonans týdyryp, otbasylyq-turmystyq daýlar men olardyń quqyqtyq túrde zerttelýi týraly suraqtardy qaıta kún tártibine shyǵardy. Resmı qorytyndy jarıalanǵanymen, marqumnyń anasy kúdigi seıilmegenin aıtyp otyr.
