Jańa Salyq kodeksiniń jobasynda qosymsha qun salyǵynyń mólsheri 16% bolady, shekti mólsher 40 mln teńge dep belgilendi. Bul týraly Májilistiń jalpy otyrysynda premer-mınıstrdiń orynbasary – Ulttyq ekonomıka mınıstri Serik Jumanǵarın málimdedi, dep habarlaıdy Bairaqmedia.kz.

Mınıstrdiń aıtýynsha, áleýmettik mańyzy bar taýarlarǵa qosymsha qun salyǵy salynbaıdy.

Jańa Salyq kodeksiniń jobasynda depýtattardyń usynysy boıynsha mynadaı salyq stavkalary saqtaldy:

– áleýmettik mańyzy bar azyq-túlik ónimderi, kitap basyp shyǵarý, arheologıa qosymsha qun salyǵynan bosatylady;

– áleýmettik salada, densaýlyq saqtaýda qosymsha qun salyǵynan bosatylǵan dárilik zattardyń áleýmettik tizbesin Úkimet anyqtaıdy. Tek aqyly medısınalyq qyzmetterge 10% qosymsha qun salyǵy salynady;

– áleýmettik saladaǵy korporatıvti tabys salyǵy kezeń-kezeńimen ósedi – 2026 jyldan bastap 5%-ǵa jáne 2027 jyldan bastap 10%-ǵa;

– arnaýly salyq rejıminde tyıym salynatyn emes, ruqsat etilmeıtin tizim engiziledi. Tyıym salynbaǵannyń barlyǵyna ruqsat beriledi;

– aýyl sharýashylyǵy taýaryn óndirýshiler úshin «mınýs 70%» jeńildik stavkasy kúshinde qalady;

– óńdeý ónerkásibi úshin korporatıvti tabys salyǵy mólsherlemesi 20% kúıinde qalady;

– Bank operasıalary boıynsha da qosymsha qun salyǵy alynatyn bolady. Básekelestikti qorǵaý agenttigi Úkimetpen birlesip, baǵanyń ósýine jol bermeý úshin qoldanystaǵy tarıfterdiń negizdiligine taldaý júrgizedi.