AQSH prezıdenti Donald Tramtyń qazaqstandyq taýarlarǵa salynatyn baj salyǵyn ósirýi eki el arasyndaǵy taýar aınalymyna sonshalyqty áser ete qoımaıdy. Bul týraly Saýda jáne ıntegrasıa mınıstrligi málimdedi, dep habarlaıdy Bairaqmedia.kz.
AQSH tarapynan qabyldanǵan jańa saýda sharalaryn aldyn ala taldaý nátıjesinde, Qazaqstannan AQSH-qa eksporttalatyn taýarlarynyń eleýli bóligine qosymsha tarıfterdiń áseri bolmaıtyny anyqtaldy. Óıtkeni olar AQSH ákimshiliginiń normatıvtik aktilerinde kózdelgen erekshelikter tizimine engizilgen, – delingen mınıstrlik habarlamasynda.
Ulttyq statısıka búrosynyń málimetteri boıynsha, 2024 jyldyń nátıjesi boıynsha Qazaqstan men AQSH arasyndaǵy taýar aınalymy 4,2 mlrd AQSH dollarǵa jetti. Bul ótken jylmen salystyrǵanda 4%-ǵa artyq (4,1 mlrd AQSH dollary). Qazaqstannyń AQSH-qa eksport kólemi 2024 jyly 30,6%-ǵa artyp, 2,0 mlrd AQSH dollar boldy. AQSH-tan Qazaqstanǵa ımport kólemi 2,2 mlrd AQSH dollary boldy.
Qazaqstannyń AQSH-qa eksport qurylymynda negizgi oryn alatyn taýarlar — shıki munaı, ýran, kúmis, ferrosplavtar jáne basqa da taýarlar. Bul sanattaǵy ónimder AQSH Prezıdentiniń «Taýarlar saýdasyndaǵy mańyzdy jáne turaqty tapshylyqty joıý maqsatynda ózara tarıfter arqyly ımportty retteý týraly» Jarlyǵy boıynsha erekshelikter tizimine engizilgen taýarlardyń 92% quraıdy.
Qosymsha bajdar belgili bir taýar toptaryna qatysty engiziletin bolady. Bul sanattaǵy taýarlardyń eksport kólemi byltyr 95,2 mln AQSH dollaryn qurady. Olardyń ishinde — fosfor (2024 jyly eksport kólemi 15,9 mln AQSH dollary), ferrosılısıı (12,7 mln AQSH dollary), lınzalar (4,1 mln AQSH dollary), bıdaı kleıkovınasy (4 mln AQSH dollary), amonı nıtraty (2,4 mln AQSH dollary). Qabyldanǵan tarıftik sharalar Qazaqstannyń AQSH-qa jalpy eksportynyń tek 4,8%-yna ǵana áser etedi. Úkimet Qazaqstanǵa qatysty qosymsha bajdardy qoldanbaý múmkindigin talqylaý úshin AQSH tarapymen konsýltasıalar júrgizýge nıetti, – dep qosty mınıstrlik ókilderi.
Sonymen birge vedomstvo ókilderi Qazaqstan 10 jyl boıy Dúnıejúzilik saýda uıymynyń (DSU) múshesi bolǵanyn jáne syrtqy saýda saıasatyn júzege asyrýda uıymnyń prınsıpterin qatań ustanatynyn atap ótti. AQSH-pen ekijaqty yntymaqtastyq aıasynda Qazaqstan halyqaralyq mindettemelerge sáıkes saýdada teń jáne kemsitýshilikke jol bermeıtin jaǵdaılardy qamtamasyz etedi.
