Prezıdent bul týraly Respýblıka kúnine arnalǵan saltanatty jıynda aıtty. Bul týraly Aqorda málim etti.
— Biz aýqymdy jańǵyrý kezeńine qadam bastyq. Maqsatymyz — barshaǵa teń múmkindik usynatyn, órkendeý jolyndaǵy Ádiletti Qazaqstannyń irgesin qalaý. Taıaýda halyqqa arnaǵan Joldaýymda Parlamentti reformalaý týraly málimdedim. Bul bastamany aldyn ala jarıalaýymnyń ózi elimizdegi saıası úderisterdiń ashyq júrip jatqanyn kórsetedi. Bıliktiń zań shyǵarýshy tarmaǵyn ózgertý sońǵy jyldary júzege asyrylǵan jan-jaqty jańǵyrýdyń qısyndy jalǵasy bolmaq. Barlyq usynysymyz Qazaqstannyń evolúsıalyq damýyna qatysty azamattarymyzdyń múddesi men suranysyna negizdelgen. Al elimiz alǵa jyljyp, damýy kerek. Buǵan esh kúmán joq, bolýy da múmkin emes. Josparlanǵan ózgerister Parlamenttiń quzyreti men bedelin kúsheıtedi. Konstıtýsıaǵa engiziletin ózgertýler Parlamentke ǵana qatysty emes, sondaı-aq Prezıdent, Úkimet týraly bólimderdi jáne saıası júıeniń basqa da qyrlaryn qamtıdy. Túzetýlerdiń jalpy kólemin jáne 2022 jylǵy konstıtýsıalyq reforma aıasynda júzege asqan bastamalardy eskersek, muny jańa Konstıtýsıa qabyldaýǵa barabar is deýge bolady. Áıtse de Qazaqstan Respýblıkasy kúshti prezıdenttik bılikke arqa súıegen memleket bolyp qalýǵa tıis ekenin atap ótkim keledi. Bul qazirgideı almaǵaıyp zamanda elimizdiń senimdi keleshegine kepil bolady. Óıtkeni parlamenttik júıe qaýipsizdik pen tártip, turaqtylyq pen damý turǵysynan óz mindetin tolyq atqara almaı otyr. Keıbir sarapshylar men saıasatkersymaqtardyń ushqary tujyrymdaryna kózsiz erip, memlekettiligimizge qater tóndirýge esh haqymyz joq, — dedi Memleket basyshysy.
