Búgin 26 naýryzdan 27 naýryzǵa qaraǵan tún — Qadir túni, dep habarlaıdy Bairaqmedia.kz.

Qazaqstan musylmandary dinı basqarmasynyń tóraǵasy, Bas múftı Naýryzbaı Taǵanulynyń aıtýynsha, Qadir túni — qasıetti, taǵdyr, tarylý degen maǵynalardy bildiredi. 

Alla Taǵala Quranda: «Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady» («Qadir» súresi, 1-5-aıattar) dep baıandaıdy.

Rasynda, Ramazan aıynyń qasıetti bolýynyń uly erekshelikteriniń biri – Qadir túninde taǵdyrdyń jazylýy. Al Qadir túniniń qasıetti bolýynyń máni – adamzat balasyn eki dúnıe baqytyna jeteleýshi qasıetti kitabymyz Qurannyń túsýi, – deıdi bas múftı.

Qadir túninde jasaýǵa keńes beriletin amaldar:

- Quran súrelerin oqý;

- duǵa jasaý;

- ıstıǵfar aıtý (keshirim suraý);

- sadaqa berý;

- zikir aıtý (Allany eske alý) – bul túnde «Sýbhanallah», «Allahý Akbar», «Áshhadý án lá ıláhá ıllallah» degen sózder júrekterdi tazalap, Allanyń raqymyna jaqyndatady.