Pavlodar qalasynda erkin kúresten qazaqstandyq balýan, Olımpıada oıyndarynyń qola júldegeri Dáýlet Shabanbaıǵa qatysty qylmystyq is boıynsha sot úkimi shyqty, dep habarlaıdy bairaqmedia.kz.

Sportshyǵa Ulttyq ulannyń patrúl qyzmetkerlerine kúsh qoldandy degen aıyp taǵylǵan. Tergeý materıaldaryna sáıkes, qyrkúıek aıynda túsken shaǵymnan keıin Dáýlet Shabanbaı keshki saǵat 21:00 shamasynda dámhana mańynda patrúl qyzmetkerleri tarapynan toqtatylǵan.

Qyzmettik tekseris deregine súıensek, tártip saqshylarynyń suraqtary men eskertýlerine ol balaǵat sózder aıtyp, bir qyzmetkerdi ıtergen. Sonymen qatar patrúl basshysynyń ıyǵynan teýip, betine soqqy jasaǵany, al taǵy bir áskerı qyzmetkerdiń kózinen jaraqattaǵany aıtyldy. Oqıǵa ornyna qosymsha jasaq shaqyrylyp, tek sodan keıin ǵana sportshy jerge jatqyzylyp, qolyna kisen salynǵan.

Sot prosesi barysynda memlekettik aıyptaýshy Dáýlet Shabanbaıdy tórt jylǵa bas bostandyǵynan aıyrýdy surady. Aıyptalýshy óz kinásin moıyndaǵanymen, jaryssózge qatysýdan bas tartty.

Sóz sońynda ol jábirlenýshilerden keshirim surady.

Tek keshirim suraǵym keledi. Jigitter, renjimeńizder, – dep qysqa ǵana pikir bildirdi.

Sot sheshimimen Olımpıada oıyndarynyń qola júldegeri Dáýlet Shabanbaı kináli dep tanyldy. Oǵan ortasha qaýipsizdik deńgeıindegi túzeý mekemesinde jazasyn óteýmen úsh jylǵa bas bostandyǵynan aıyrý jazasy taǵaıyndaldy.