Úkimette áleýmettik mańyzy bar azyq-túlik ónimderiniń baǵasyn turaqtandyrý máseleleri boıynsha keńes ótti. Talqylaý qorytyndysy boıynsha premer-mınıstrdiń orynbasary – Ulttyq ekonomıka mınıstri Serik Jumanǵarın turaqtandyrý qorlarynda kókónisti saqtaý jumysyn tıisti deńgeıde atqarmaǵan oblys ákimderiniń orynbasarlaryna sógis jarıalady, dep habarlaıdy Bairaqmedia.kz.
Saýda jáne ıntegrasıa mınıstrliginiń málimetinshe, ótken aptada áleýmettik mańyzy bar azyq-túlik ónimderiniń ortasha baǵa ındeksi 0,2% bolǵan. Bul – 2025 jyldyń basynan bergi eń tómen kórsetkish.
Saýda jáne ıntegrasıa birinshi vıse-mınıstri Aıjan Bıjanova osy jyldyń basynan beri áleýmettik mańyzy bar azyq-túlik ónimderiniń baǵasynyń ortasha ósimi 3,4% bolǵanyn, biraq naýryzdyń basynan bastap baǵanyń ósý dınamıkasy 0,4%-ǵa báseńdegenin atap ótti. Eń joǵary baǵa ósimi kartopqa (+19,3%), qyryqqabatqa (+23,2%) jáne sıyr etine (+9,0%) tıesili. Sonymen qatar kúrishtiń (-3,4%), jumyrtqanyń (-2,1%) jáne unnyń (-0,3%) baǵasy tómendegeni baıqaldy.
«Baǵanyń eń joǵary ósimi Aqtóbe oblysynda (+0,8%), Shyǵys Qazaqstan jáne Pavlodar oblystarynda (+0,5%), Jetisý oblysynda (+0,4%) tirkeldi. Sonymen qatar Astanada (-0,2%) jáne Batys Qazaqstan oblysynda (-0,1%) baǵa ındeksi tómendedi», – dep atap ótti Aıjan Bıjanova.
Aýyl sharýashylyǵy vıse-mınıstri Erbol Tasjúrekov óńirlerdegi kókónis qorlarynyń bosatylý barysy týraly habarlady. Jergilikti atqarýshy organdardyń málimetinshe, 12 naýryzdaǵy jaǵdaı boıynsha áleýmettik-kásipkerlik korporasıalar (ÁKK) turaqtandyrý qorlary úshin kelisimshart jasaǵan kartop qory 41,3 myń tonna bolǵan. Alaıda keıbir óńirlerde júrgizilgen tekserý nátıjesinde málimdelgen kólem men kartoptyń naqty qory arasynda aıtarlyqtaı aıyrmashylyq bar ekeni anyqtaldy.
Mańǵystaý oblysynda málimdelgen ÁKK-niń 2,5 myń tonnadan astamynyń tek 25 tonnasy ǵana naqty rastaldy. Shyǵys Qazaqstan oblysynda málimdelgen ÁKK-niń 1,6 myń tonnadan astamynyń tek 35 tonnasy ǵana bolǵan. Atyraý oblysynda málimdelgeni – 394 tonna, rastalǵany – 110 tonna. Abaı oblysynda málimdelgeni 2,2 myń tonnadan astam, rastalǵany 183 tonna. Jambyl oblysynda málimdelgeni 2,6 myń tonnadan astam, tekserý nátıjesinde bar bolǵany 308 tonna rastaldy. Ulytaý oblysynda ÁKK 1,8 myń tonnadan astam dep málimdegenniń naqty 827 tonnasy bolǵan. Batys Qazaqstan oblysynda ÁKK málimdegen 2,3 myń tonnadan astamynyń 1,3 myń tonnasy rastaldy, – delingen Ukimet habarlamasynda.
Anyqtalǵan kemshilikter negizinde vıse-premer oblys ákimderiniń orynbasarlaryna kartop qorlarynyń durys baqylanbaýyna baılanysty sógis jarıalady. Serik Jumanǵarın jergilikti atqarýshy organ tarapynan tıisti baqylaý bolmasa, qabyldanǵan sharalardyń nátıjeleri tıisti áser bermeıtinin atap ótti.
Kartop baǵasyn turaqtandyrý úshin Úkimet endi Qazaqstanǵa Pákistan men Qytaıdan arzan baǵadaǵy ımporttyq kartop jetkizbek. Qazirdiń ózinde Saýda komıteti men «KTZ EXPRESS» ekonomıkalyq operatorymen birge 4000 tonna astam kartop ımporttaldy, taǵy 700 tonna jolda.
