Mańǵystaýda mektep oqýshylarynyń janjaly aýrýhanaǵa jetkizýmen aıaqtaldy, dep habarlaıdy Bairaqmedia.kz.

Aqparatqa sáıkes, Munaıly aýdanyndaǵy №12 jalpy bilim beretin mektepte bolǵan janjal saldarynan 8-synyp oqýshysy jaraqattanyp, oblystyq balalar aýrýhanasynyń travmatologıa bólimine jatqyzyldy. Bul týraly jergilikti bılik pen salalyq basqarmalar málimdedi.

Jasóspirim anasynyń aıtýynsha, synyptastary arasyndaǵy kelispeýshilik ótken jyldyń qazanynda bastalǵanmen, mektep ákimshiligi tıisti sharalar qoldanbaǵan.

Oblystyq densaýlyq saqtaý basqarmasynyń málimetinshe, oqýshynyń jaǵdaıy qazir turaqty, búgin, 12 mamyrda aýrýhanadan shyǵarylýy josparlanyp otyr.

Atalǵan oqıǵaǵa baılanysty mektepte zardap shekken balanyń ata-anasymen, mektep ákimshiligimen, polısıa qyzmetkerlerimen jáne medısına mamandarymen arnaıy kezdesý uıymdastyryldy. Kezdesý barysynda bilim berý uıymynda oqýshylar arasynda qaqtyǵystar men býllıng derekteri buryn da bolǵany, alaıda bul jaǵdaılar tıisti organdarǵa jetkizilmegeni belgili boldy.

Oblystyq bilim basqarmasynyń habarlaýynsha, tóbeleske qatysqan oqýshylardyń ata-analaryna QR ÁQBtK-niń 435-baby boıynsha ákimshilik aıyppul salynǵan. Sonymen qatar, oqýshylar men olardyń ata-analaryna profılaktıkalyq psıhologıalyq jumystar júrgizilgen.

Qazir bul oqıǵa Munaıly aýdany ákimdigi janyndaǵy kámeletke tolmaǵandar isi jónindegi komısıanyń qaraýyna joldandy. Bilim basqarmasy tarapynan qyzmettik tekserý júrgizilip jatyr.