Almatyda áıelin pyshaqtap óltirgen polıseı qandy qylmysty jumys ýaqytynda jasaǵan bolyp shyqty, dep habarlaıdy Bairaqmedia.kz.
Bizdiń redaksıaǵa muny dáleldeıtin qujat kelip tústi. Almaty oblystyq polısıa departamenti qyzmetkerleriniń jumysta bolǵan ýaqyty belgilengen qaǵazda Serik Nahımovtiń sol kúni, ıaǵnı, 3 mamyrda jumysta bolǵany anyq kórsetilgen. Iaǵnı, tańǵy 8:00-den keshki 20:00-ge deıin Almaty-Bishkek trassasynda qyzmette bolýǵa tıis bolǵan.
Alaıda, kúdikti tańerteń jumysqa kelgenmen, túste belgisiz sebeppen ketip qalǵan. Sol ýaqytta ol Shuǵyla yqshamaýdanyndaǵy páterine baryp, áıelin pyshaqtap, artynsha óziniń moınyn sýyq qarýmen oryp jibergen bolatyn. Jantúrshigerlik qylmysty ol 3 balasynyń kózinshe jasaǵan.
Al, mamyrdyń biri jáne ekisi kúnderi 39 jastaǵy er adam densaýlyǵyna baılanysty jumysta bolmapty.
Osylaısha, Almaty qalalyq polısıa departamenti taratqan aqparattyń shyndyqqa janaspaıtynyn baıqaýǵa bolady. Ondaǵylar kúdiktiniń Almaty oblysynyń polısıa departamentine qarasty bólimshelerdiń birinde qyzmet etkenin rastaǵanmen, buǵan deıin qyzmetinen qýylǵan degen edi.
Kúdikti buǵan deıin Almaty oblysy PD-de qyzmet atqarǵan, alaıda teris sebeptermen jumystan bosatylǵan. Qazirgi ýaqytta bolǵan oqıǵanyń barlyq mán-jaıyn anyqtaý úshin tergeý amaldary júrgizilýde, - delingen Almaty qalalyq PD habarlamasynda.
Al, redaksıa Almaty oblystyq polısıa departamentiniń baspasóz qyzmetine birneshe ret habarlasty. Alaıda oqıǵa týraly eshqandaı aqparat bermedi.
Qazir Serik Nahımov kúzettiń baqylaýymen aýrýhanada jatyr. Ol jansaqtaý bóliminen hırýrgıa bólimshesine aýystyrylǵan. Densaýlyǵy ortasha aýyr jaǵdaıda deıdi dárigerler.
Qaıǵyly oqıǵa ótken senbide bolǵan edi. Kúıeýi aıaýsyz pyshaqtaǵan 34 jastaǵy áıel alǵan jaraqattarynan sol jerde til tartpaı ketken. Ol Uzynaǵash aýylynda balabaqsha dırektory bolyp qyzmet etken. Al, kıkiljińge otbasylyq janjal sebep bolǵan.
Kórshi-qolań erli-zaıyptynyń jıi janjaldasqanyn estigenderin málimdedi. Qazir qandy oqıǵaǵa qatysty qylmystyq is qozǵalyp, tergeý júrip jatyr.
