Memleket basshysy Qasym-Jomart Toqaev pen Natasha Pırs-Mýsar shaǵyn quramda kelissóz júrgizdi.
Qasym-Jomart Toqaev mártebeli meımanǵa iltıpat bildirip, onyń sapary Qazaqstan-Slovenıa seriktestigin tereńdetýge septigin tıgizip, keń múmkindikterge jol ashatynyn aıtty.
– Slovenıamen tyǵyz yntymaqtastyq qurýǵa nıettimiz. Bul – anyq. Prezıdent retinde ózara múddemizge saı keletin barlyq saladaǵy baılanysty nyǵaıtýǵa kúsh-jigerimdi salamyn. Biz Slovenıany Qazaqstannyń Balqan túbegindegi negizgi jáne óte mańyzdy seriktesteriniń biri retinde qarastyramyz. Sizdiń eldiń bıznes ókilderine jáne úkimetińizge birqatar utymdy joba usyna alamyz, – dedi memleket basshysy.
Prezıdenttiń aıtýynsha, Slovenıanyń Qazaqstan ekonomıkasyna salǵan tikeleı ınvestısıasynyń kólemi 200 mıllıon dollarǵa jýyqtady. Elimizdegi farmasevtıka, mashına jasaý, telekomýnıkasıa jáne jańartylatyn energıa kózderi salalarynda Slovenıa kapıtalynyń úlesi bar 19 kompanıa kásibin tabysty júrgizip keledi. Budan bólek, Qazaqstan men Slovenıanyń kólik-logıstıka, sıfrlandyrý jáne ınovasıa, densaýlyq saqtaý, týrızm baǵyttarynda ózara seriktestikti arttyrýǵa áleýeti zor.
Slovenıa prezıdenti ózine jáne delegasıasyna qonaqjaılyq tanytqany úshin Qasym-Jomart Toqaevqa shynaıy rızashylyǵyn jetkizdi.
Dıplomatıalyq qarym-qatynas ornaǵan 33 jyl ishinde eki el arasynda birde bir sheshilmegen másele bolǵan emes. Munyń ekonomıkalyq yntymaqtastyqty keńeıtýge, órkendetýge mol múmkindik beretinin durys atap óttińiz. Sondyqtan ózimmen birge bıznes ókilderiniń úlken delegasıasyn alyp keldim. Olar qazaqstandyq áriptestermen birge seriktestikti ilgeriletýge qatysty baǵyttardy talqylap jatyr. Ekonomıkalyq yqpaldastyǵymyz artyp keledi. Degenmen budan da zor jetistikterge jetemiz dep oılaımyn. Prezıdentter men saıasatkerler arasyndaǵy baılanystar árqashan bolashaqqa baǵdarlanady. Óıtkeni saıasatkerler bıznestiń kókjıegin keńeıtedi, – dedi Natasha Pırs-Mýsar.
Sondaı-aq kelissóz barysynda taraptar jahandyq jáne óńirlik kún tártibindegi ózekti máseleler boıynsha jan-jaqty pikir almasty.
