Шымкент әуежайында құны 227,8 миллион теңге болатын алтынды Түркияға заңсыз алып шығу әрекеті әшкереленді. Өзбекстан азаматтары бағалы металды кедендік бақылаудан жасыру үшін ерекше тәсіл қолданған, деп хабарлайды Bairaqmedia.kz Бас көлік прокуратурасының мәліметіне сілтеме жасап.
Прокуратураның хабарлауынша, күдіктілер салмағы шамамен 2,8 келі алтынды чемодандардың ішкі астарына және багаждың қаптамасына ұсақ бөлшектер түрінде жағып, шекарадан білдірмей өткізбек болған. Алайда заңсыз әрекеттің жолы кесілді. Бас көлік прокуратурасының өтінішхаты негізінде сот үкім шықпай тұрып-ақ алтынды мемлекет кірісіне тәркілеу туралы шешім қабылдады.
Қазіргі уақытта қылмысқа қатысы бар деген күдікке ілінген Өзбекстан азаматтары халықаралық іздеуге жарияланды.
Аталған дерек бойынша сотқа дейінгі тергеу жалғасып жатыр.
