Қызылорда облысының екі ауданында жылқылар жаппай қырылып жатыр. Жануарлардан белгісіз ауру шілде айында анықталған. Жылқылардың басы ісініп, жағы тартылып қалады, кейін өледі, деп хабарлады Вairaqmedia.kz «31 арна»-ға сілтеме жасап.
Жалағаш және Сырдария аудандарының фермерлері тұтас табындардың қырылып жатқанын айтуда. Жайылымдар өлген жануарларға толы, алайда олардың қырылу себебі әлі анықталған жоқ. Жылқылар жем жеп, су іше алмайды, сондықтан оларды қорада ұстауға тура келеді.
«Аузына шөпті салып алып, сол күйі жүре береді. Мақсатсыз кезіп жүреді. Бір аптадан кейін өледі. Менің өзімде қазірдің өзінде бес-алты жылқы өлді», – дейді Сырдария ауданының тұрғыны Амандық Қиясов.
Басқа фермерлердің 20-ға дейін жылқысы қырылған. Олардың айтуынша, мамандар өлген жануарлардың санын есептемейді және сынама алмайды. Фермерлер диагнозы анық болса, дәрі-дәрмек сатып алуға дайын.
Ал ветеринарлар жағдай тұрақты деп отыр. Олардың айтуынша, нақты себепті анықтау үшін сараптама нәтижелерін күту қажет.
«Ауырған жануарлардың қан үлгілерін облыстық ветеринария басқармасына жібердік. Енді нәтижелерін күтуіміз керек. Бұл трипаносомоз болуы мүмкін деп болжап отырмыз (паразиттер қоздыратын ауыр ауру. – Авт.). Алдын ала вакцинация жүргізілді. Қазір эпизоотиялық жағдай тұрақты», – деп мәлімдеді Сырдария аудандық ветеринариялық станциясының басшысы Нұрлыбек Дәулетбаев.
Ол ауру жұқпалы болмағандықтан, өтемақы қарастырылмағанын атап өтті. Ал фермерлерді қазір қалған жылқыларын аман алып қалу мәселесі ғана алаңдатып отыр.
