Атырау облысының қылмыстық істер жөніндегі мамандандырылған ауданаралық сотында төрт адамды өлтірді деп айыпталған Сұлтан Сәрсемалиевке қатысты резонанс тудырған іс бойынша алдын ала тыңдалым өтті, деп хабарлайды bairaqmedia.kz.
Сотта жарияланған тергеу материалдарында күдіктінің қылмыстан кейін елден қалай кеткені туралы тың деректер айтылды.
Тергеу мәліметінше, Сәрсемалиев қаза болғандардың мүлкін иемденіп, туыстарының сенімін пайдаланған. Сонымен қатар отбасы мүшелерінің денсаулық жағдайына байланысты қалыптасқан ахуалды өз пайдасына қолданған деген күдік бар.
Айыптау тарабының нұсқасы бойынша, қолына түскен ақшаны ол жеке жағдайын жақсартуға әрі шетелге қашуды ұйымдастыруға жұмсаған. Іс материалдарында марқұмдардың балалары Сұлтанның анасының қарауында қалғаны көрсетілген. Іздестіру шаралары басталғанын байқаған күдікті Атыраудан тез арада кетуге шешім қабылдаған.
Тергеушілердің айтуынша, онымен бірге Ақбаян Мұқанғалиева да шетелге шыққан. Айыптау актісінде күдіктінің оны Қазақстанда қалдыру қауіпті деп санағаны жазылған. Себебі жақын туыстарының болмауы мен отбасы мүлкін рәсімдеу үшін шетелге шығуы күдік тудыруы мүмкін болған.
Қылмыстық іс деректеріне сәйкес, 2025 жылғы 9 желтоқсанда Сәрсемалиев пен Мұқанғалиева «Қапланбек» бекеті арқылы Өзбекстанға өткен. Кейін 13 желтоқсанда Ташкент – Куала-Лумпур – Бали бағытымен ұшып, Индонезияға барған.
Олар Бали аралында екі айдан астам уақыт бойы жасырынған. Алайда 2026 жылғы 24 ақпанда визалық режимді бұзғаны үшін Индонезияның көші-қон қызметі күдіктілерді ұстаған. Кейін олар Қазақстанға депортацияланды.
Ал 2026 жылғы 9 наурызда Сәрсемалиевтің қатысуымен жүргізілген тергеу әрекеттері кезінде Атыраудағы Мұнайшы ықшамауданындағы үй ауласынан Өтешқалиева мен Қарабалиннің жерленген мәйіттері табылған.
Іс бойынша келесі сот отырысы 28 мамыр күні сағат 10:00-ге белгіленді.
