Сауд Арабиясында Меккедегі мешітте «әдепсіз әрекет жасады» деп айыпталған Бангладештің екі азаматына өлім жазасы қолданылды. Олардың ер адам мен әйел екені белгілі, деп хабарлайды Bairaqmedia.kz Associated Press агенттігіне сілтеме жасап.
Сауд Арабиясы Ішкі істер министрлігінің мәліметінше, өлім жазасы 14 қазанда орындалған. Елдің Жоғарғы соты шығарылған үкімді күшінде қалдырып, оны орындауға король рұқсат берген.
Алайда Сауд Арабиясының билігі сотталғандардың нақты қандай әрекеті үшін ең ауыр жазаға тартылғанын жарияламаған. Сондықтан олардың мешітте бір-бірінің маңдайынан сүйгені үшін жазаланғаны ресми түрде расталмаған. Бангладеш үкіметі екі азаматының өлім жазасына кесілгенін үкім орындалғаннан кейін ғана білгенін мәлімдеді. Осыған байланысты елдің Сыртқы істер министрлігі Сауд Арабиясы билігіне ресми сауал жолдаған.
Бангладеш тарапы сот процесінің мән-жайы, тағылған айыптар және үкімнің орындалуына қатысты толық ақпарат сұратқан. Ресми жауап алынғаннан кейін марқұмдардың мәйіттерін елге қайтару және өзге де дипломатиялық шаралар мәселесі қарастырылмақ.
