Қазақстанда бүгін, 20 қазанда, бірқатар салық есептілігін тапсыру және міндетті төлемдерді төлеу мерзімі аяқталады. Мемлекеттік кірістер комитеті азаматтар мен кәсіпкерлерге салық міндеттемелерін уақытылы орындауды ескертті, деп хабарлайды Bairaqmedia.kz.
Мемлекеттік кірістер органдарының мәліметінше, бүгінге дейін салық есептілігінің бірнеше нысанын тапсыру қажет. Атап айтқанда, 328.00 нысаны бойынша қыркүйек айында әкелінген тауарлар мен жанама салықтарға қатысты өтініш, 851.00 нысаны бойынша жер учаскелерін пайдаланғаны үшін ағымдағы төлемдер есебі және 870.00 нысаны бойынша қоршаған ортаға теріс әсер еткені үшін төлемақы декларациясы қабылданады.
Сонымен қатар 20 қазанда Еуразиялық экономикалық одақ елдерінен импортталған тауарларға қосылған құн салығын, акциздерді және қоршаған ортаға теріс әсер еткені үшін төлемақыны төлеу мерзімі аяқталады. Бұдан бөлек, орман және өсімдік ресурстарын пайдаланғаны үшін тиісті төлемдерді аудару қажет. Мемлекеттік кірістер органдары салық төлеушілерге есептілікті тапсыру мен төлемдерді соңғы сәтке қалдырмауға кеңес береді. Міндеттемелерді уақытында орындамау берешектің пайда болуына және өсімпұл есептелуіне әкелуі мүмкін.
Айта кетейік, 27 қазанда корпоративтік және жеке табыс салығы, әлеуметтік салық, зейнетақы жарналары мен басқа да әлеуметтік төлемдер бойынша кезекті төлем мерзімі аяқталады.
