تۋريزم جانە سپورت ءمينيسترى ەربول مىرزابوسىنوۆ ەلوردادا ۇلتتىق سپورت ۋنيۆەرسيتەتىنىڭ قۇرىلىسىن جۇرگىزىپ جاتقان شۆەيساريالىق Mabetex كومپانياسىنىڭ باسشىلىعىمەن ماڭىزدى كەزدەسۋ وتكىزدى. تاراپتار جوبانىڭ قازىرگى كەزەڭى، قۇرىلىس جۇمىستارىنىڭ ساپاسى جانە ۋنيۆەرسيتەتتىڭ بولاشاق ينفراقۇرىلىمىن تالقىلادى، دەپ حابارلايدى Bairaqmedia.kz. 

كەزدەسۋدەن كەيىن مينيستر ءبىلىم ورداسىنىڭ قۇرىلىس بارىسىمەن جانە جوبانىڭ ءبىرىنشى جانە ەكىنشى كەزەڭدەرىنىڭ جوسپارىمەن تانىستى. ەربول مىرزابوسىنوۆ قۇرىلىس جۇمىستارىن ساپالى ءارى بەلگىلەنگەن مەرزىمدە اياقتاۋدىڭ ماڭىزىن اتاپ ءوتتى. جوسپار بويىنشا ۋنيۆەرسيتەتتىڭ العاشقى كەزەڭى مامىرىڭ سوڭىنا قاراي پايدالانۋعا بەرىلمەك.

ءقازىر ءبىرىنشى كەزەڭ اياسىنداعى قۇرىلىس جۇمىستارى اياقتالۋعا جاقىن. مامىردا كوپفۋنكسيونالدى سپورت كەشەنى، ستاديون، جەڭىل اتلەتيكا مانەجى، ءجۇزۋ باسسەينى، كوللەدج عيماراتى جانە 500 ورىندىق جاتاقحانا قولدانىسقا بەرىلەدى. بۇل – وقۋ پروسەسىن باستاۋعا قاجەتتى نەگىزگى ينفراقۇرىلىم.

جوبا تولىق ىسكە قوسىلعان كەزدە ۋنيۆەرسيتەت سپورت سالاسىنداعى مامانداردى دايارلاۋدىڭ تولىققاندى جۇيەسىن – كوللەدجدەن باستاپ دوكتورانتۋراعا دەيىنگى دەڭگەيلەردى قامتيدى. مۇندا ءبىر مەزگىلدە 2000-نان استام ستۋدەنت پەن 60-قا جۋىق ماگيسترانت جانە دوكتورانت ءبىلىم الادى.

ەربول مىرزابوسىنوۆ اتالعان جوبانىڭ ىسكە اسۋى ەلىمىزدەگى سپورتتىق ءبىلىم بەرۋ جۇيەسىنە تۇبەگەيلى وزگەرىس ەنگىزىپ، حالىقارالىق دەڭگەيدەگى كاسىبي كادرلاردى دايارلاۋعا جول اشاتىنىن ايتتى.

«ۋنيۆەرسيتەت ينفراقۇرىلىمى تەك ءبىلىم بەرۋ مەكەمەسى رەتىندە عانا ەمەس، كوپسالالى سپورتتىق جانە عىلىمي ورتالىق رەتىندە دە قىزمەت ەتەدى. بۇل ءوز كەزەگىندە ەلىمىزدەگى تۋريزم مەن سپورت سالاسىنىڭ دامۋىنا سەرپىن بەرىپ، وڭىرلىك جانە حالىقارالىق ىنتىماقتاستىقتى نىعايتۋعا مۇمكىندىك بەرەدى»، – دەدى تۋريزم جانە سپورت ءمينيسترى.