اقمولا وبلىسىندا سۇيىتىلعان گاز ساتۋمەن اينالىساتىن ەكى كاسىپكەرلىك سۋبەكتىگە جوسپاردان تىس تەكسەرۋ جۇرگىزىلىپ، تۇتىنۋشىلاردى الداۋ فاكتىلەرى انىقتالدى، دەپ حابارلايدى Bairaqmedia.kz.

ساۋدا جانە ينتەگراسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتىنىڭ وڭىرلىك دەپارتامەنتى سەنىمسىز، ياعني تەكسەرۋدەن وتپەگەن ولشەۋ قۇرالدارىنىڭ پايدالانىلعانىن انىقتاعان.

بۇل زاڭبۇزۋشىلىقتار ولشەم بىرلىگىن قامتاماسىز ەتۋ تۋرالى زاڭ تالاپتارىنا قايشى كەلەدى جانە تۇتىنۋشىلاردىڭ قۇقىقتارىن بۇزۋ ءقاۋپىن تۋدىرادى. قوس سۋبەكتىگە جالپى 1 061 640 تەڭگە كولەمىندە اكىمشىلىك ايىپپۇل سالىندى.

2024 جىلدىڭ باسىنان بەرى وبلىستا 20-دان استام گاز قۇيۋ بەكەتىنە پروفيلاكتيكالىق باقىلاۋ جۇرگىزىلىپ، بارلىق جاعدايدا بۇزۋشىلىقتار تىركەلگەن.

ناتيجەسىندە:

• 14 نىسانعا رەسمي ۇيعارىم بەرىلدى

• 84 جابدىقتى پايدالانۋعا تىيىم سالىندى

• 22 سۋبەكتىگە قاتىستى ءىس قوزعالىپ، اكىمشىلىك جاۋاپكەرشىلىككە تارتۋ شارالارى قابىلداندى.

مەملەكەتتىك ورگان وكىلدەرى بۇل شارالار تۇتىنۋشى قۇقىقتارىن قورعاۋ جانە ءادىل ساۋدانى قامتاماسىز ەتۋ ءۇشىن قولعا الىنعانىن اتاپ ءوتتى. ولار ازاماتتاردى زاڭسىزدىقتاردى بايقاسا، جەرگىلىكتى تەحنيكالىق رەتتەۋ ورگاندارىنا شاعىمدانۋعا شاقىردى.