قازاقستاندىق سپورتشىلار كونكۋر بويىنشا ەۋرازيالىق ليگاداعى الەم كۋبوگى كەزەڭىندە جۇلدەلى ورىندارعا يە بولدى، دەپ حابارلايدى Bairaqmedia.kz.
17–20 ءساۋىر ارالىعىندا تاشكەنتتە (وزبەكستان) كونكۋردان ەۋرازيالىق ليگاداعى الەم كۋبوگىنىڭ كەزەڭى ءوتتى. قازاقستان بۇل بەدەلدى تۋرنيرگە العاش رەت قاتىسىپ وتىر.
ەلىمىزدىڭ نامىسىن قورعاعان ەكى سپورتشى دا جۇلدەلى ورىندارعا يە بولدى: كسەنيا باتالوۆا Lady Di تۇلپارىمەن (160 سم بيىكتىكتەگى 6-شى مارشرۋتتا) كۇمىس جۇلدەنى يەلەندى. نۇريلا تۋرىسبەكوۆا Nagano B اتتى تۇلپارمەن (130 سم بيىكتىكتەگى 5ء-شى مارشرۋتتا) قولا مەدالعا يە بولدى.
جارىسقا قازاقستان، وزبەكستان، قىرعىزستان ەلدەرىنىڭ مىقتى شاباندوزدارى قاتىستى. بۇل ەۋرازيالىق ليگانىڭ كۇنتىزبەسىنە ەنگىزىلگەن جانە حالىقارالىق ماۋسىمنىڭ ماڭىزدى كەزەڭى بولىپ تابىلادى. قازاقستاندىق سپورتشىلاردىڭ بۇل جارىستارداعى ناتيجەسى حالىقارالىق ارەنادا باسەكەگە قابىلەتتى ەكەندىگىن تاعى دا دالەلدەيدى.
