Йемендегі хуситтер Сауд Арабиясы мен Йемен аумағындағы бірқатар нысанға зымырандар мен дрондар арқылы шабуыл жасады. Сауд Арабиясы бастаған коалиция Эр-Риядтың солтүстігіне бағытталған баллистикалық зымыранды әуеде жойғанын мәлімдеді, деп хабарлады Bairaqmedia.kz.
Йемен Көлік министрлігінің мәліметінше, 7 қазан күні таңертең Аден халықаралық әуежайына баллистикалық зымырандар мен жарылғыш зат тиелген дрондармен соққы жасалған. Зымырандардың бірі ұшу-қону жолағына жақын жерге Каирден келе жатқан жолаушылар ұшағы қонардан бірнеше минут бұрын түскен. Қауіпсіздік мақсатында әуе кемесі Аденге қондырылмай, Сауд Арабиясының Жидда қаласына бағытталды. Әуежайдағы тағы екі ұшақ қауіпсіз жерге шығарылған.
Сонымен қатар хуситтер Сауд Арабиясының астанасындағы Король Халид халықаралық әуежайын бірнеше дронмен нысанаға алғанын мәлімдеді. Топ Абха халықаралық әуежайы мен Хамис-Мушайттағы әскери базаға да зымырандар және дрондар жібергенін хабарлады. Бұл мәлімдемелердің бір бөлігін Сауд Арабиясы билігі әзірге растаған жоқ.
Аймақтағы жағдай Йемен үкіметінің күштері Сауд Арабиясы бастаған коалицияның әуе қолдауымен Қызыл теңіз жағалауындағы стратегиялық аумақтарды қайтару үшін қарсы шабуыл бастағаннан кейін күрделене түсті. Әсіресе халықаралық теңіз саудасы үшін маңызды Баб-эль-Мандеб бұғазы маңында қақтығыстар күшейген.
