Қазақстанда мұнай-газ химиясы саласы туралы жеке заң әзірленеді, деп хабарлайды Bairaqmedia.kz.
Премьер-министр Олжас Бектеновтің төрағалығымен өткен Үкімет отырысында химия және мұнай-химия саласын дамыту мәселесі қаралды.
«Мұнай-газ бизнесі өкілдерімен өткен кеңесте мұнай-газ химиясы саласы туралы жеке заң әзірлеу мәселесі көтерілді. Бұл бастаманы қолдаймын. Энергетика, Өнеркәсіп және құрылыс, Ұлттық экономика, Әділет министрліктеріне осы жылдың 1 қыркүйегіне дейін Үкімет Аппаратына тиісті заң жобасын енгізуді тапсырамын», — деп атап өтті премьер-министр Олжас Бектенов.
Өнеркәсіп және құрылыс министрі Ерсайын Нағаспаевтың айтуынша, бүгінде химия өнеркәсібінің өңдеу өнеркәсібі құрылымындағы үлесі 4,6%-ды құрайды және ауыл шаруашылығы, металлургия, құрылыс материалдары өндірісі сияқты салалардың дамуына оң әсер етеді.
Жыл қорытындысы бойынша өндіріс көлемі 7,7%-ға өсіп, 1,1 трлн теңгеден асты. Саланың негізгі кәсіпорындары ішкі сұраныстың қажеттіліктерін қамтамасыз етеді және экспорттық әлеуетті дамытады.
«Жылдың тоқсандық қорытындысы бойынша өнім көлемі 12,5%-ға өсіп, 406 млрд теңгені құрады. Осы жылы өндіріс көлемін 5%-ға арттыру көзделген. Жоспар бойынша өсім биылғы іске асырылатын жобалар және тыңайтқыштар мен фосфорды 13%-ға, натрий цианидін 15%-ға, полипропилен өндірісін 32%-ға арттыру арқылы іске асырылатын болады», – деді ол.
Жыл қорытындысы бойынша өндіріс көлемі 7,7%-ға өсіп, 1,1 трлн теңгеден асты. Саланың негізгі кәсіпорындары ішкі сұраныстың қажеттіліктерін қамтамасыз етеді және экспорттық әлеуетті дамытады.
Жалпы, министр атап өткендей, соңғы бес жылда сала жыл сайын орта есеппен 5%-ға өсумен тұрақты оң динамиканы көрсетіп отыр. Бұл – отандық өндірушілердің жүйелі жұмысы мен мемлекет тарапынан қолдаудың нәтижесі.
