Қазақстанда музыка және бейнелеу өнерінің дамуына үлес қосқан азаматтарды мемлекеттік деңгейде марапаттау үшін екі жаңа ерекшелік белгісін енгізу ұсынылды, деп хабарлайды Bairaqmedia.kz
Құрылтай отырысында депутат Л.Ә. Жылқыбаева «Қазақстан Республикасының мемлекеттік наградалары туралы» заңға өзгерістер енгізу жөніндегі заң жобасын таныстырды. Құжат Мемлекет басшысы Қасым-Жомарт Тоқаевтың тапсырмасына сәйкес әзірленген. Президент бұған дейін «Шәмші Қалдаяқов» медалін және «Қазақстанның еңбек сіңірген суретшісі» құрметті атағын енгізуді тапсырған болатын.
Заң жобасына сәйкес, «Шәмші Қалдаяқов» медалі отандық музыка мен ән өнерін дамытуға елеулі үлес қосқан азаматтарға берілмек. Ал «Қазақстанның еңбек сіңірген суретшісі» атағымен бейнелеу өнерінде жоғары кәсіби шеберлік танытып, отандық көркем мәдениетті дамытуға үлес қосқан қайраткерлерді марапаттау ұсынылып отыр. Депутаттың айтуынша, бастаманың негізгі мақсаты – мәдениет пен өнер өкілдерінің еңбегін мемлекеттік деңгейде бағалау және ынталандыру.
