Qazaqstan ұлттық телеарнасының Tansholpan бағдарламасында қонақ болған әнші Өмірқұл Айниязов отбасы құндылықтары мен бала тәрбиесіне қатысты ойымен бөлісті, деп хабарлайды bairaqmedia.kz.

Бағдарлама барысында ол баласын ата-әжесінің қолына табыстағанын, алайда бұл шешімге қатысты өз ұстанымы барын жасырмады. Өнер иесі өзі де бала күнінде ата-әже тәрбиесін көргенін айтып өтті. Айтуынша, бастауыш сыныпты аяқтағанға дейін ата-әжесінің жанында өсіп, кейін ғана ата-анасының қолына барған.

«Екі жаққа да еркелеп өстім. Бірақ бір ерекшелігі өз әке-шешемді “аға, жеңге” деп атадым. Сол сезімнің қандай екенін ішім жақсы біледі. Сондықтан өз баламды ата-анама бергенде бір-ақ талап қойдым. Ол мені әкесі ретінде тануы керек. Мен келгенде “әке” деп алдымнан шығуы тиіс», — деді әнші.

Өмірқұл Айниязовтың бұл ойы әлеуметтік желіде кеңінен талқыланды. Бірқатар оқырман оның сөзінен бала кездегі ішкі сағыныш пен психологиялық әсерді аңғарғанын жазса, енді біреулері ата-әже тәрбиесінің оң қырларын атап өтті.

«Травма деген осы. Өз ата-анасын іздеу, сағыну», «Бұрынғы заман солай болды, қазір бәрі басқаша», «Ата-әже тәрбиесі баланы көпшіл, мейірімді етеді», «Қазіргі “травма” дегенді қолдан шығарып алғандаймыз», — деп пікір қалдырды желі қолданушылары.

Жалпы көпшілік әншінің көзқарасына түсіністікпен қарап, баланың кімнің қолында өскеніне қарамастан, әке мен шешенің орны мен рөлін анық сезінуі аса маңызды екенін атап өтті.