Терроризм мен экстремизм қазіргі қоғам үшін аса қауіпті құбылыстардың бірі. Осындай топтарды қаруландырғандарға қандай жаза қарастырылған? Бұл туралы Түркістан облысы Дін істері басқармасының «Дін мәселелерін зерттеу орталығының» бейнеролигінде айтылған, - деп хабарлайды bairaqmedia.kz

Қазақстан заңнамасында террорлық және экстремистік әрекеттерге қатысушыларды тарту, даярлау және қаруландыру қатаң жазаланады. Осы тұрғыда Қазақстан Республикасы Қылмыстық Кодексінің 259-бабы маңызды рөл атқарады.

Бірінші тармағы террористік немесе экстремистік әрекетті ұйымдастыру мақсатында адамдарды азғырып, даярлау немесе қаруландыру. Мұндай жағдайда мүлкі тәркіленіп, 8 жылдан 12 жылға дейін бас бостандығынан айыру қарастырылады. Екінші тармақ, адам өзінің қызмет бабын пайдалана отырып немесе кәмелетке толмаған адамға қатысты жасалған дәл сол іс-әрекет мүлкі тәркіленіп, 10 жылдан 15 жылға бас бостандығынан айыруға жазаланады, - делінген видеода.

Қазақстан Республикасы Қылмыстық Кодексінің 259-бабы терроризм мен экстремизмге қарсы күресте маңызды құқықтық құрал болып табылады. Адамдарды азғырып, даярлап, қаруландыру қоғамның тыныштығы мен мемлекеттің қауіпсіздігіне тікелей қатер төндіретін ауыр қылмыс екенін мамандар тағы бір ескертті.