«Egov.press» Telegram-арнасында жарияланған сарбаздардың бейнематериалына қатысты ҚР Қорғаныс министрлігі мәлімдеме жасады, деп хабарлады Вairaqmedia.kz.
«Жарияланған бейнежазба екі бөліктен тұрады. Бірінші бөлігінде Шымкент қаласындағы Әскери-техникалық мектеп тыңдаушыларының әскери техникамен тактикалық сабақтарға шығуы көрсетілген. Яғни, көліктегі бұл кадрлар бейнежазбаның екінші бөлігінде көрсетілген оқиғаларға қатысы жоқ. Екінші бөлігінде Шымкент қаласындағы Әскери-техникалық мектеп филиалының аумағында жоспарлы парк-шаруашылық күні барысында болған оқиғалар көрсетілген. Парк-шаруашылық күні – бекітілген аумақтар мен нысандарда тәртіп орнатуға, үй-жайларды тазалауға, техниканы күтіп-ұстауға, сондай-ақ басқа да шаруашылық-тұрмыстық жұмыстарды орындауға арналған күн», – деп жазылған ақпаратта.
Кадрлар Әскери-техникалық мектептің тыңдаушылары оқу орнының аумағын абаттандыру және күтіп-ұстау жұмыстарына қатысқан сәтте түсірілген.
«Сонымен қатар, Қазақстан Республикасы Қорғаныс министрлігі аталған факт бойынша тыңдаушыларды көрсетілген жұмыстарға тартудың белгіленген тәртібінің сақталуын тексеру мақсатында қызметтік тергеп-тексеру тағайындады. Тексеру қорытындысы бойынша лауазымды тұлғалардың әрекеттеріне құқықтық баға беріледі. Заң бұзушылықтар анықталған жағдайда кінәлі тұлғалар қолданыстағы заңнамаға сәйкес жауапкершілікке тартылады», – делінген мәтінде.
Еске салайық, 23 шілде күні әлеуметтік желіде сарбаздардың құрылыс алаңында жүрген видеосы тараған еді.
