Мадагаскарда кәмелетке толмағандар мен жастарды ұрлау және қатыгездікпен өлтіру оқиғалары салдарынан қаза тапқандарды еске алу үшін 24 шілде Ұлттық аза тұту күні болып жарияланды, деп хабарлады Вairaqmedia.kz.
Үкімет міндетті ресми рәсімдерді қоспағанда, барлық қоғамдық ойын-сауық және мерекелік шараларды өткізуге тыйым салды.
Алдағы аза тұту күні барлық азаматтар үшін ресми ақылы демалыс күні болып белгіленді. Сонымен қатар, тәулік бойы ел аумағында алкоголь өнімдерін сатуға толық тыйым салынып, барлары бар қоғамдық тамақтану орындары жабылады.
Биылғы алғашқы алты айдағы алаңдатарлық статистиканы ресми органдар жариялады. Осы кезеңде құқық қорғау органдарына балалар мен жастардың жоғалуына қатысты 172 арыз түскен. Ең күрделі жағдай ел астанасы Антананариву орналасқан Аналаманга аймағында тіркелді. Аталған өңірде 119 адам жоғалу оқиғасы тіркелген.
Ұлттық полицияның Бас басқармасының мәліметінше, 81 адам аман-есен табылған. Тағы 83 азаматтың тағдыры белгісіз болып отыр. Іздеу жұмыстары барысында кемінде 8 қаза тапқан баланың денесі табылған.
Президент Майкл Рандрианирина болған жағдайды қатаң айыптап, бұл қылмыстарды терактілер деп бағалады. Оның айтуынша, қылмыскерлердің басты мақсаты – елдегі саяси және әлеуметтік тұрақтылықты бұзу.
