ءۇندىستاندا نايزاعايدان 33 ادام قازا تاپتى جانە ونداعان ادام جارالاندى. بۇل جاعداي بىرنەشە كۇن بويى جالعاسقان مۋسسوندىق جاۋىن-شاشىن مەن داۋىل كەزىندە بولعان، دەپ حابارلادى bairaqmedia.kz.

تابيعي اپاتتارعا قارسى كۇرەس جونىندەگى مەملەكەتتىك باسقارمانىڭ مالىمەتىنشە، بيحار شتاتىندا ادامداردىڭ قازا تابۋى سارسەنبى مەن بەيسەنبى ارالىعىنداعى كۇشتى داۋىلدار كەزىندە بولعان. قازا تاپقانداردىڭ باسىم بولىگى — اشىق اسپان استىندا جۇمىس ىستەگەن فەرمەرلەر مەن جۇمىسشىلار.

شتاتتىڭ كەيبىر ايماقتارىندا الداعى كۇندەرى نوسەر جاۋىن مەن نايزاعاي بولجانىپ وتىر.

بيحار شتاتىنىڭ تابيعي اپاتتار باسقارماسىنىڭ ءمينيسترى ۆيدجاي كۋمار ماندالدىڭ ايتۋىنشا، شەنەۋنىكتەرگە ساقتىق شارالارىن كۇشەيتۋ تاپسىرىلعان.

شتات ۇكىمەتى نايزاعاي سالدارىنان قازا تاپقانداردىڭ وتباسىلارىنا 4 ميلليون رۋپيي (شامامەن 4 600 اقش دوللارى) كولەمىندە وتەماقى تولەيتىنىن حابارلادى.

بيحار بيلىگىنىڭ مالىمەتىنشە، 2024 جىلى نايزاعايدان كەمىندە 243 ادام قازا تاپقان، ال 2023 جىلى بۇل كورسەتكىش 275 ادامدى قۇراعان.

ءۇندىستاننىڭ شىعىس ايماقتارى، سونىڭ ىشىندە بيحار شتاتى، جىل سايىن مۋسسون ماۋسىمىندا سۋ تاسقىنىنا ۇشىرايدى. بۇل كەزەڭدە ونداعان ادام قازا تاۋىپ، جۇزدەگەن مىڭ تۇرعىن ەۆاكۋاسيالانادى.