الماتى وبلىسىندا تۋريستىك ايماقتاردىڭ ينفراقۇرىلىمىن جاقسارتۋ، قاۋىپسىزدىگىن قامتاماسىز ەتۋ جانە سيفرلاندىرۋ بويىنشا جۇمىستار قارقىندى جۇرگىزىلۋدە، دەپ حابارلايدى bairaqmedia.kz

وڭىردەگى ءتۋريزمدى دامىتۋ بويىنشا اتقارىلىپ جاتقان جۇمىستاردى وبلىس اكىمى مارات سۇلتانعازييەۆ جىپكە ءتىزدى. ونىڭ ايتىنشا، وتكەن جىلى قونايەۆ قالاسىندا جالپى اۋماعى 2،7 گەكتاردى قۇرايتىن №5 قالالىق جاعاجاي پايدالانۋعا بەرىلگەن. جاعاجاي اۋماعىندا ويىن جانە سپورت الاڭدارى، جارىقتاندىرۋ، سۋمەن جابدىقتاۋ جۇيەلەرى ورناتىلىپ، دارەتحانالار، پيرستەر جانە سەرۆيستىك نىساندار ىسكە قوسىلعان. بۇدان وزگە دە اتقارىلعان جۇمىستار جەتەرلىك.

«كولساي كولدەرى» ۇلتتىق پاركى مەن تاڭبالى تاس شاتقالىندا نەگىزگى تۋريستىك ورىندار اباتتاندىرىلدى. اتاپ ايتقاندا، پيرستەر، كۇركەلەر، فوتوزونالار، جارىقتاندىرۋ جانە كەمپينگ الاڭدارى ورناتىلدى. 2025 جىلى باسپالداقتار، اقپاراتتىق تاقتالار، قالقىما بەلگىلەر مەن باسقا دا جۇمساق ينفراقۇرىلىم ەلەمەنتتەرىن ورناتۋ جوسپارلانۋدا، - دەدى الماتى وبلىسىنىڭ اكىمى مارات سۇلتانعازييەۆ.

ءوڭىر باسشىسىنىڭ ايتۋىنشا، ينفراقۇرىلىمدىق جوبالار دا قاتار جۇزەگە اسىرىلىپ جاتىر ەكەن. ماسەلەن،«Oi-Qaragai» كۋرورتىنا گاز جۇرگىزۋ جوباسى ماقۇلدانعان. بۇل ءۇشىن جەرگىلىكتى بيۋدجەتتەن 325،7 ملن تەڭگە بولىنگەن. قۇرىلىستى اياقتاۋ 2025 جىلدىڭ سوڭىنا جوسپارلانعان. سونىمەن قاتار، «Oi-Qaragai»، «اقتاس»، «تاۋ تۇران» جانە وزگە دە نىسانداردى سىرتقى ەلەكتر قۋاتىمەن جابدىقتاۋ جوباسى ازىرلەنىپ جاتىر دەيدى مارات سۇلتانعازييەۆ.

قاۋىپسىزدىكتى قامتاماسىز ەتۋ ماقساتىندا ونلاين تولەم جۇيەسى ەنگىزىلدى، بەينەباقىلاۋ كامەرالارى جانە اۆتوماتتاندىرىلعان كىرەبەرىس بەكەتتەر ورناتىلدى. ALMATYREGION.TRAVEL ءموبيلدى قوسىمشاسى ءۇش تىلدە ىسكە قوسىلدى. سيفرلاندىرۋ اياسىندا «Kazakh Tourism» ۇلتتىق كومپانياسىمەن بىرلەسىپ Your Tourist Pass ۆيرتۋالدى كارتاسى ىسكە قوسىلدى. بۇل كارتا تۋريستەرگە قاجەتتى بارلىق سەرۆيستەرگە قولجەتىمدىلىك بەرەدى، - دەدى ءوڭىر باسشىسى.

«eQonaq» شەتەل ازاماتتارىن تىركەۋ اقپاراتتىق جۇيەسىنىڭ دەرەكتەرىنە سايكەس، 2025 جىلدىڭ 1 شىلدەسىنە دەيىن وڭىرگە 80،8 مىڭ شەتەلدىك تۋريست كەلگەن.